Annaassiniarneq upalungaarsimanerlu paasisaqarfikkit
Saqqummiissussat politiini, Ilulissani napparsimmavimmi qatserisarfimmilu kiisalu Air Greenlandimi atorfiliupput. Saqqummiisut tamarmik annaassiniartoqartillugu isumagisassatik eqqartussavaat, ajutoortoqarpallu annaanniarneqartut annaassiniartunik oqilisaallutik namminnerlu annaanneqarsinnaaniarlutik iliuuserisinnaasaat saqqummiutissallugit.
- Maanimi ulluinnarni inuunitsinni pisariaqartilersinnaavagut. Akuttunngitsunik annaassinartarpugut, arlalitsigullu inuit Kalaallit Nunaanni pinngortitami imaanilu kusanaqisumi angalanerminni eqqarsarluaqqaarsimannginnerat pissutigalugu suliavut artornarsisarput. Inuit VHF radiomik imaluunniit satellittelefonimik nassartuartartuuppata attaveqatigiinniarneq ajornannginnerussangaluarpoq, aamma GPS nassatanut ilanngunneqartuaraluarpat annaassiniartut oqilisaavigineqassangaluarput, Ilulissani politeeq Karl Vinther knr.gl-imut oqarpoq.
Peqataasoqarnissaa aaqqissuisut neriuutigaat, namminerlu aamma innuttaasut taatsimiinneranni ilikkagaqarnissartik ilimagaluguttaaq. Umiatsiarsorlutik aalisartut inuunermik sivisunersaat imarsiortaramik taakkua misilittagaat annaassiniartunut iluaqutaalluarsinnaapput.
-Imaassinnavoq VHF radiomik sumiiffiit anguneqarsinnaanngitsut paasissaqarfigisinnaassavagut ikiorsiiffiginiassallutigillu. Inuuniarnermi imaata taama pingaaruteqartiginera eqqarsaatigalugu tamaani angalasut amerlanerpaat isumannaatsumik angalasinnaasariaqarput. Angalasulli namminneq isumannaallisaasinnaapput. Ajunaalernermi atisartakkat soorlu sungaartumik qalipaatillit pisiarineqartarpata tamanna annaanneqarsinnaanermut apeqqutaasinnaavoq, qaqortut imaluunniit taartumik qalipaatillit taartumi takuneqarsinnaaneq ajormata. Annaassiniartartunut annaanniarneqartunullu iluaqutaasinnaasunik peqataasut taamatut paasissutissinnissaat neriuutigaarput, Karl Vinther oqarpoq.
