Annaassiniarneq iluatsilluartoq

Uummannami politiit tallimanngormat ualikkut nal. ataasinngortoq Aasiaat Radioanniit kalerrinneqarput Uummannap avannaani Illorsuit ungasinngisaanni aalisariut 27 fodsilik motooriminik unittoorsimalluni VHF-ikkut ikioqqulluni kallerisaariisimasoq.

Sila imarlu pitsaavallaanngikkaluartut ikiuiniarneq ingerlaannaq piareersarneqalersimasoq, Uummannap politiivineersoq Gert Kristiansen oqaluttuarpoq. Angallat "Hanne Gitte", suliffeqarfimmit Lasømit pigineqartoq, aallartinneqarpoq, Illorsuarmiillu umiatsiaaqqat sisamat ujaasiartortinneqarlutik, silarluppallaarmalli ataaseq utiinnartariaqarsimavoq.

Umiatsiaaqqat angummata angallat immalereersimavoq, qulaanilu qulimiguulik Air Alphameersoq sillimalluni qulangiuaarivoq, pisariaqalissappat annanniummik piareersimatitaminik nakkartitseriaannaalluni.

Qulimiguulik S-61 kivitsissutitalik aamma aallartinneqarsimagaluarpoq, annaanniakkalli navianartorsiortoqarunnaarmata Ilulissanut killiinnarsimavoq.

Umiatsiaaqqat Illorsuarneersut ikiuiartupallassimanerat qujassutissaasoq nersualaartariaqartullu, Gert Kristiansen oqarpoq, taamatullu angallatip "Hanne Gitte"-p inuttai qutsavigisariaqarnerarpai.

Aalisariummi issimasut pingasut Hanne Gitte-mut ikineqarput, qatsorseereerlutillu unnukkut nal. 19.00 ajoratik Uummannamut tikissimasut, Gert Kristiansen oqaluttuarpoq.