Meeqqat atugarissaarnerat aningaasatigut nalilersorneqassanngitsoq, Anna Wangenheim oqarpoq.Assi: Malik Brøns / KNR

Anna Wangenheim meeqqat pillugit isumaqatigiissut pillugu: Aallartiaanngikkutta akisunerussaaq

Naalakkersuisut FN-ip Meeqqat pillugit Isumaqatigiissutaanut periusissialiorsimannginneri Demokraatit sinnerlugit Inatsisartuni ilaasortap Anna Wangenheimip pakatsissutigai.

FN-ip Meeqqat pillugit Isumaqatigiissutaata inatsisinngortinnissaa Namminersorlutik Oqartussanut akisussasoq, suliaqartussanillu ilinniarsimasunik amerlanerusunik atorfinititsinermik pisariaqartitsisoqassasoq Meeqqanut Inuusuttunut Ilaqutariinnullu Naalakkersuisoq Paneeraq Olsen (N) oqarpoq.

Anna Wangenheimip (D) tamanna pakatsissutigaa. Akissutit tigussaanngitsuusut aningaasallu apeqqutaassanngitsut taanna isumaqarpoq.

Naalagaaffit Peqatigiit Meeqqat pillugit isumaqatigiissutaat sunaana?

 

Danmarkimi naalagaafiup siunnersuisoqatigiivini Meeqqat siunnersuisoqatigiivi, meeqqat inuusuttullu pisinnaatitaaffiinik qulakkeerisussat naapertorlugit meeqqat pillugit isumaqatigiissut maleruagassanik assigiinngitsunik nunanit malinneqartussaasunik ilaqarpoq.


Isumaqatigiissut Danmarkimi 18-it inorlugit ukiulinnut nunanit suminngaaneeraluartunulluunniit tamanut atuuppoq. Isumaqatigiissutip meeqqamut pitsaanerpaasoq tunngaviusumik qulakkeerniartarpaa:
 

- Meeqqap tunngaviusumik pisinnaatitaaffii, soorlu nerisaqarneq, peqqinneq, siniffissaqarnerlu.

- Meeqqap ineriartornissamut pisinnaatitaaffii, soorlu atuarneq, sunngiffeqarneq, pinnguarneq paasissutissarsineq.

- Meeqqap illersorneqarnissamut pisinnaatitaaffii, soorlu sorsunnermut, nakuusernermut, atornerluinermut atuinerlunnerlu.

 

- Meeqqat aalajangeeqataasinnaanermut pisinnaatitaaffii, soorlu sunniuteqaqataaneq, peqataaneq, killiligaananilu oqaaseqarsinnaaneq.

 

Meeqqat pillugit isumaqatigiissut pillugu annerusumik uani atuagaqarit.

 

Paasissutissarsiffik: Meeqqat siunnersuisoqatigiivi.

AAMMA ATUARUK Naalakkersuisut: FN-ip Meeqqat pillugit Isumaqatigiissutaata inatsisinngortinnissaa akisussaqaaq

Meeqqat atugarissaarnerat aningaasatigut nalilersorneqassanngitsoq taanna oqarpoq.

- Isumaqanngilanga meeqqat atugarissaarnerat akimik aalajangersimasumik naleqartumik oqaatigineqarsinnaasoq. Kingunissai suuppat? Taakku kingunissai eqqarsaatigisariaqarpagut.

- Kingunerluutit assigiinngitsut meerartatta massakkut nalaatarisaat suli akisunerujussuupput, taamaammat iliuuseqartariaqarpugut, utoqqatsissutiginagu aningaasat taama amerlatigineri pissutigalugu taakku siunissami imminut akilerumaarnerat naatsorsuutigineqassaaq, Demokraatinit Inatsisartuni ilaasortaq Anna Wangenheim oqarpoq, nangipporlu:

- Siusinnerusukkut suliniuteqarsinnaagutta aningaasat taakkartorneqartut - 300 millionit koruunit - siunissami sipaarutigineqarsinnaasut isumaqarpunga.

Periusissiaq sivisuumik utaqqineqartoq

Inatsisartut Naalakkersuisut FN-ip Meeqqat pillugit isumaqatigiissutaata malinneqarnissaanut 2015-imili periusissioqquaat. Periusissiaq pineqartoq qaqugu saqqummersinneqassanersoq Anna Wangenheim taamaammat apeqqutigaa.

Periusissiaq suliarujussuusussaasoq Meeqqanut Inuusuttunut Ilaqutariinnullu Naalakkersuisoq Paneeraq Olsen apeqqummut akissutigaa. Meeqqat pillugit Isumaqatigiissut inatsisinngortinneqassappat ukiumut 300 millionit koruunit missiliorlugit aningaasartuutinik nassataqassasoq naatsorsuutigalugu.

- Akissutit tigussaanngitsut isumaqarpunga. Taamaammat akissutinut pakatsivunga.

- Isumaqarpunga akissutigineqartut ilaatigut pakatsinartumik akissutigineqartut, tassami tigussaanngitsumik akissutigineqaramik.

- Una immikkut maluginiarpara tigussaasumik inatsisitigut allannguinissamik malitseqarnissaanik pilersaaruteqartoqannginnera pakatsissutigivara, Anna Wangenheim oqarpoq.

AAMMA ATUARUK MIO-mut saaffiginnittut amerlisut: Nunatsinni meeqqat tamakkerlugit suli ikiorsersinnaanngikkigut nassuerutigisariaqarparput

Naalakkersuisut ukiut arfineq-marluk kingulliit periusissiornissamut periarfissqarsimagaluartut, periusissiornissap qanoq akeqarnissaa suli ilisimaneqanngilaq.

- Utaqqiinnarsinnaanngilagummi oqarluta suliassat angivallaartut, tassami aalajangiinissaq uatsinniippoq politikerini, Anna Wangenheim oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl