Assi: KNR / Malik Brøns

Anna Wangenheim: Coronamut killilersuinerup sivitsornissaa pingaaruteqarpoq

Coronamut tunngatillugu killilersuinerup sivitsorneqarnissaa pisariaqartoq, peqqissutsimut naalakkersuisoq isumaqarpoq. Akiuussutissalersuinerup nalaani taamaalilluni tuniluutsitsinaveersaartoqassaaq, peqqinnissaqarfinnilu tuniluuttoqannginnissaanik tapersersuinerussasoq, taanna oqarpoq.

Nunarput avammut matuneqaraluartoq, killilersuinerit suli unitsinneqanngillat.

Tuluit Nunaanni corona allanngortoq nassaarineqartoq, maanna Europami Danmarkimilu ajornartorsiutigineqarpoq. Nunatsinnili tuniluutilinnginniassammat Naalakkersuisut killilersuinerit sivitsoqqippaat.

"Sulisussaqarniarnikkut inissisimanerput ima kipiluttunartigami, avataaniit tiksiitsinissarput suiavaqqussinnaannginnatsigu, Anna Wagenheim oqarpoq.

- Qanoq annertutigisumik ulorianartorsiortitsisoqaleriataarsinnaava? Taamaammat nalunaarutit sivitsorneqarneqarput. Taamatullu nunarput tamakkerlugu akiuussutissalersueruttorpugut, tamannalu qularnaatsumik ingerlanneqarsinnaaniassammat, Anna Wangenheim (D) oqarpoq itisiliillunilu:

Katerinnissamut malittarisassat


Inuit amerlanerpaamik 100-it 2021-mi apriilip ulluisa 30-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."

- Uku ernumassutaanerpaammata, kommunimiit kommunimut unammiuaartitsisoqassagaluarpat tuniluunnerlu aallartissagaluarpat, sinerissami, peqqinnissaqarfitta tamanna kivissinnaanngilaa. Uangalu akisussaatillunga illersorsinnaanngilara.

Pisumut assingusumik nunatsinni aamma nalaattaqareersugut, Anna Wangenheim oqarpoq. Aasiannimi peqqinnissaqarfimmut suliartortoq, tikinnerminit ullut tallimat qaangiunneranni misissorteqqinnermini coronavirusimik tunillatsissimasoq januarimi paasineqarpoq.

Kinguneqassasoq ilisimaneqarpoq

Killilersuinerup sivitsorneqarneranut nunatsinnut qanoq kinguneqassanersut, peqqissutsimut naalakkersuisumit ilisimaneqarluarput.

Assersuutigalugu ingerlanneqartussat annertuut soorlu, Arctic Circle Race aamma assammik arsarnermi pissartanngorniunnerit taamaatiinnarneqarput.

"Sinerissami tuniluunnerlu aallartissagaluarpat, peqqinnissaqarfitta tamanna kivissinnaanngilaa. Uangalu akisussaatillunga illersorsinnaanngilara." Anna Wagenheim.

Tuniluunneq maannamut annikikkami qujanavissumik. Taamaammat innuttaasunit tapersersorneqarnissarput suli kissaatigivarput. Taavalu pingaarnertut oqaatigerusuppara: Neriuut aajuna takkutiliivippoq, sulilaaq qaammatialuit akiuussutissalersuisoqareerpat, innuttaasut amerlanerpaat kapitinnissaat qulakkiilaariarlugu, killilersuutit piissaqqaarput.

Peqqinnissaqarfik inuiaqatigiillu illersorneqassapput

Nunatta matuneqavinnissaa periarfissaanngilaq. Peqqinnissaqarfik tamatuminnga nammassinnaanngilaq.

- Sulisussaqarniarnikkut inissisimanerput ima kipiluttunartigami, avataaniit tiksiitsinissarput suiavaqqussinnaannginnatsigu, Anna Wagenheim oqarpoq.

AAMMA ATUARUK Akiuussutissamik kapuineq illoqarfinni nutaani pingasuni aallartinneqangajalersoq

Danmarkimiit nunatsinnut peqqinnissaqarfimmut inuit 120-t missaanniittut qaammatit tamaasa suliartortarput, taakkulu nunatsinnit atorfissaqartsinneqarlutik. Nunatsinnili tuniluuttoqalissagaluarpat, peqqinnissaqarfinni inissat naammannavianngitsut, naalakkersuisoq oqarpoq.

AAMMA ATUARUK Coronaregler om forsamlinger og arrangementer er forlænget

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat