Anisitaasut inigisaannut eqqiaanermi akit assigiinngeqisut

Assersuutigalugu inissiaatileqatigiiffiup Nuummi 30.000 koruunit akiliutigisarpai, naak suliassap asserluinnaa Qaqortumi 6.000 koruuniinnarnik akeqaraluartoq.

Inissianik attartortut anisitaagaangamik nammineerlutik pequtimik poortornissaat eqqiaanissarlu isumagisussaavaat. Kisianni anisitsisoqarnerata kingornagut pequtinik poortuineq eqqiaanerlu Inissiaatileqatigiiffimmit isumagineqakkajuppoq.

Inissianik attartortunik anisitsisoqartillugu A/S INI suliffeqarfimmik pequtinik poortuisartussanik eqqiaasartussanillu isumaqatigiissuteqanngilaq. Taamaalilluni attartortunik anisitsisoqartillugu nunani tamalaani suliffeqarfissuaq ISS pequtinik poortuinissamik eqqiaanissamillu isumaqatigiissuteqarfigineqanngilaq.

Aalajangersimasumik akeqartitsisoqanngimmat, suliassanik isumaginnittuusut nammineerlutik qanoq akeqartitsissanerlutik aalajangertarpaat.

Taamaattunik suliassaqalersillugu ISS pequtinik poortuisinneqarlunilu eqqiaatinneqartarpoq, soorlu Nuummi Narsamilu ISS tamakkuninnga suliaqartinneqartartoq.

Nuummi pequtinik poortuineq eqqiaanerlu ISS-imit isumagineqaraangat 30.000 koruunit angullugit akeqarsinnaasarpoq.

Ullaaq radioaviisimi oqaluttuaraarput 2006-imi ISS Narsami inissiamik sisamanik initalimmik pequtinik poortuinermut eqqiaanermullu 30.000 koruuningajannik akiligassiisimasoq.

Qaqortumi A/S Inip illoqarfimmi suliffeqarfik nutsernermik suliaqartartoq sulisittarpaa, 6.000 koruuninillu akiliisarluni.

- Sumiiffiit ilaanni ISS kisimi tamakkuninnga isumaginnissinnaavoq, sumiiffiillu ilaanni suliffeqarfik ataaseq nutsertunik isumaginnittartoq kisimi periarfissaavoq allanilu tamakkuninnga isumaginnissinnaasunik soqanngitsoq, A/S INI-mi tusagassiinermi ataqatigiissaarisoq Paninnguaq Fleischer-Lyberth ilisimatitsivoq.

Sisimiuni A/S INIp viceværtit ikiortaalu eqqiaanermut atortarpai. Taamaattorli Sisimiuni suliffeqarfiup eqqiaanermik isumaginnittartup oqaatigaa, inissiamik pingasunik sinittarfilimmik eqqiaassagaluarunik 6.000 koruuninik akiliisitsissallutik. Inissiarlu annerusumik eqqiagassaappat 10.000 koruunit angullugit akiliisitsisinnaasarlutik.

ISS-ip akigitittagai qaffaseqisut pillugit oqaaseqartitsiniaraluaratta, kisianni suliffeqarfiup pisortaa, kisimi avammut oqaaseqarsinnaatitaasoq maanna angalammat oqaaseqartitsisinnaanngilagut.