Anisinneqarnissi utaqqimaartariaqarpaa
Herstedvesterimiittup kalaallip Ole Møllerip anisinneqarnissi utaqqimaartariaqarpaa. Taanna pinngitsaaliisimasutut pineqaatissineqarpoq ukiunilu aqqaneq-marlunni kingullerni Herstedvesterimiilluni. Ole Møller katillugit ukiut 30-t, tassa inuunermi affaata missaani Herstedvesterimiippoq sivisunerusumillu tassaniinnissi ilimagisariaqarpaa. Ingerlatitseqqinnissamik aalajangiisartut tallimanngormat aalajangerpaat 60-inik ukiullip Herstedvesterimiit anisinneqarnissaa Højesteretip aalajangiiffigissagaa.
Nunatsinni eqqartuussiviup februaarip 27-ani Ole Møllerimut tunngasoq aalajangiiffigimmaguli qaammatit sisamat qaangiupput. Ingerlatitseqqinnissamillu aalajangiisartut tallimanngormat aalajangiipput. Ole Møllerip qaammatini taakkunani Danmarkimi inuiaqatigiit akornanni inuuneqalernissi piareersarfigaa piareersalussinnarsimavorli. Nunatta eqqartuussiviata aalajangernera Herstedvesterimi suliamik ingerlatitseqqinnissamik aalajangiisartut isumaqatiginngilaat.
Ole Møllerip illersuisuata Thorkild Høyerip aalajangerneq mamiatsaatigisimallugu isertuutinngilaq:
- Danskit nunasiaatilittut imminnut isigigallarnerannituulli aalajangertoqarpoq. Kalaallit Nunaanni Danmarkimilu nunap eqqartuussiviisa aalajangerneri ataqqineqartariaqarput, Thorkild Høyer oqarpoq.
Herstedvesterimi paarnaarussiviup pisortaata tullersortaata Bent Andersenip taamatut oqarneq ilumuunnginerarpaa Ole Møllerillu Danmarkimi inuiaqatigiit akornanniilernissaanik paarnaarussiviup ingerlatitseqqiinissamik aalajangiisartoqatigiivisa pilersaarusiorsimagaat nalunaarutigaa. Taamatut pilersaarusiornerup kingunerisaanik Ole Møller arriinnerusumik inuiaqatigiit akornanniileqqinnissaanik kinguneqartussaasoq Bent Andersenip uppernarsarpaa. Anisitsinissamik pilersaarusiorneq pitsaasuusoq Danmarkimilu pinerlitsaalisitsinermut pisortaqarfimmit taamatut pilersaarusiortarneq akuerineqartoq Bent Andersenip erseqqissaatigaa.
Ole Møllerip pineqaatissinneqarnerata suliarineqarnera Højesteretimi suliarineqalerpat soorunami tamanna aamma ilannguneqarumaarpoq eqqumiiginarporli Kalaallit Nunaanni eqqartussiviup aalajangernera Herstedvesterimit malinneqarusunngimmat, Thorkild Høyer oqarpoq.
Ole Møller aggustip 27-ani Danmarkimi anisitaanissaa nunatsinnimi eqqartuussiviup aalajangernikuummagu Højesteretip suliaq sukkanerpaamik suliarisariaqarpaa Thorkild Høyer oqarpoq.
Naalagaaffiup eqqartuussisuserisuanit piffissaliunneqartoq sivikigineqarpoq. Sulinngiffeqarfiup naligimmagu suliap aatsaat aggustip aallartisimalernerani suliarineqarsinnaanissaa ilimagineqarpoq.
