Anisette nunarput pillugu: Soorlu nunarsuup aallartiffianiilluni

Nipilersoqatigiit Savage Rose pingajussaa nunatsinniipput. Ukiut arfineq pingasut matuma siorna Nuummiipput ukiullu marluk qaanngiuttut Thomas Koppel nipilersoqatigiinni nuliani Anisette peqatigalugu siuuttuusoq toqukkut qimaguppoq.

Tamatumali kingorna Anisette Koppel nutaanik nipilersoqatigiiliorpoq nipilersoqataalu nunatsinniissimanngisaannarput pania Naja nipilersoqatigiinni tulleertuusoq eqqaassanngikkaanni.

- Taamanikkut misigisimavunga ingerlaqqittariaqarlunga. Nukissaqarpunga niaqqunnilu erinnat nutaat pinngorartuarput. Qularutigisimanngilara nipilersortartut allat suleqatigalugit erinnanik nutaanik sanasinnaallunga, Anisette Koppel KNR-imut oqarpoq.

Thomas Koppelip toqunerata kingorna cd marluk Savage Rose-kkut saqqummersippaat kingullermillu cd "Love and Freedom" septemberip qaammataani saqqummersippaat maannalu nunatsinniinnerat nunani allani tusarnaartitseqattaarnissaannut aallarniutaavoq.

- Cd-mi nutaami taallat erinarsukkavut Kalaallit Nunaata pigai. Erinarsuutigaarput nunarsuup inuinut kiffaanngissuseq asanninnerlu. Kalaallit Nunaanni pinngortitaq innarlerneqarsimanngitsoq asanninnerlu nassaassaapput. Taamaammat assorsuaq nuannaarutigaarput ippassaq Nuup kangerluanut angalaarnerput tassaniimmata nunarsuarmi qaqqat pisoqaanersaat. Allaammi nunarsuup aallartiffianiittutut misigisimavugut, Anisette Koppel oqarpoq.

Nunani allani illoqarfissuarnit nunarput allaanerussuteqarpoq naak illoqarfiit ilaat illoqarfissuarpalaartumik malussarfiusaleraluartut.

- Nunarsuarmi illoqarfissuarni puullaaqinersuaqarpoq. Angajoqqaat sapaatip akunnera tamaat puullaaqisarput arfininngornermi unnukkut meeqqat nuannisaqatisinnaajumallugit vingummit qalipaatinik ulikkaartut iluarusuutigalugit, Anisette Koppel oqarpoq.

- Pinngorartitsisinnaaneq kiffaanngissutsimillu misigisimasarneq inissaarussimasutut ipput, Anisette Koppel oqarpoq.

Maanna scene piareerpoq unnugu tusarnaartitsinissaannut aqagulu Ilulissanut tusarnaartitsiartussapput.

- Neriuppugut tusarnaariat nuannisarumaartut. Aamma qularutiginngilara nipilersoqatigiit nuannisarumaartut tassami saatsinnikkumaarput inuit isigisaminnut akuliutillaqqissorsuit, Anisette Koppel oqarpoq.