Aningaasivissuaq iniminut utertinneqareerpoq
Aningaasivissuaq 300 kiilunik oqimaassusilik aningaasanik 40.-50.000 koruunit akornanniittunik aamma angallatinut piginnittussaanermut uppernarsaatinik arlalinnik imaqartoq angutit marluk ataasinngormat ullaassakkut tillissimavaat, ammarniaraluaramikkuli iluatsissinnaasimanagu, Aasianni politeeqarfimmi pisortaq Aqqaluk Petersen oqaluttuarpoq.
Angutit marluk Amutsivik Sisak Teknik-imi tillitaminnik allanik pisup kingornagut tuniniaasut innuttaasut ilaata pasitsaallugit politiinut kalerriiutigai. Politiillu tigusaralugit apersoramikkit paasivaat, aningaasivissuaq amutsivimmit ullaassaammat taakku annissimagaat, ungasinnerusumulli assartorsinnaannginnamikku, amutsiviup qanitaanut toqqorallarsimagaat. Ammarniarsimagaluarpaat iluatsinnaguli.
Angutit marluk qassit missaanni amutsivimmiissimanerlutik eqqaamanngilaat, aalakoorsimagamik. Politiit ilimagaat ataasinngormat ullaassakkut sisamat missaanni pisimassasoq, Aasianni innuttaasut pisorpaluk tamatuma nalaani tusaasimammassuk.
Angutit tigusaagamik namminneq tillinniartuullutik nassuersimapput. Nassuereermata tigusat iperarneqarput.
Suliaq suli paasiniarneqarmat politiit annerusumik paasissutissiisinnaanngikkallarput.
Politimestereqarfiup aalajangerneqarumaarpaa pineqaatissiisoqassanersoq.