Aningaaserivinni sulisut aningaasarsiaat pillugit isumaqatigiinniarnerit aallarteqqilerput

februaarip 17-at 2006 15:07

Aningaaseriviit Kattuffiata aamma Kalaallit Nunaanni Sulisitsisut Peqatigiiffiata aningaaserivinni sulisut aningaasarsiaat, sulinngiffeqartarnerat utoqqalinersiassallu pillugit isumaqatigiinniarneri ulluni pingasuni ingerlanneqareerlutik ippassaq ajalusoorput. Isumaqatigiinniarnerilli sukkanerpaamik nangeqqinneqarnissaat maanna anguniarneqalerpoq.

Kalaallit Nunaanni Sulisitsisut Peqatigiiffiata pisortaanera, Ole Rud, Aningaaseriviillu Kattuffianni siulittaasup tullia, Kent Petersen, naapertorlugit isumaqatigiinniarnerit eqqissisimasumik annerusukkullu isumaqatigiiffiullutik ingerlanneqarsimapput, aningaasarsialli pillugit oqallinnerni illuatungeriit imminnut ima ungasitsigisimapput, isumaqatigiinniarnerit unittoorlutik.

Aningaasarsiat 8,6 procentimik qaffanneqarnissaat Aningaaseriviit Kattuffiata piumasarisimavaa, Kalaallit Nunaannili Sulisitsisut Peqatigiiffiata 5,5 procent taamaallaat piumasaralugu.

Aningaaserivinni sulisut suliumajunnaarnissaat pinngitsoortinniarlugu isumaqatigiinniarnerit ataasinngorpat ullaakkumiit nangeqqinneqarnissaat Kalaallit Nunaanni Sulisitsisut Peqatigiiffiata piareersimaffiginerarpaa.

Isumaqatigiinniarnerit inernissaat Kalaallit Nunaanni atorfilinnut allanut soqutiginartuusussaavoq, aningaasarsiat pillugit isumaqatigiinniarnerit ukioq manna siullersarimmassuk, suliffeqarfiit allat aningaasarsiat pillugit ukioq manna kingusinnerusukkut isumaqatigiinnialernissaanni pissarsissutigineqarsinnaammat.