Aningaaserivinni siunnersuisut nakkutigineqalissapput
Aningaasaqarnermut nakkutilliisoqarfiup taamatut misissuinissaq ingerlatissavaa. Tassanngaanniillu aningaaseriviit misissuiffigineqartinnagit sapaatip akunneri qassiit sioqqutsisumik siumut kalerrinneqaqqaartassasut eqqarsaatigineqarpoq. Misissuinerit allat misissuiartorluni takuniaatinnani kalerriisarnerat qangali atorunnaareerpoq.
- Kutaa, aningaaserivimmi siunnersortisi misissuiffiginiarlugit ornilaalerpassi, sapaatip akunneri marluussappata neriuppugut ajorissanngikkissi.
Ikinngutinnersumik inuulluaqqusilluta Aningaasaqarnermut nakkutilliisoqarfik.
Allakkat taamatukanneq oqaasertaqarsinnaapput Aningaasaqarnermut nakkutilliisoqarfik piffissami aggersumi aningaaserivinni siunnersortinik sumi tamaaniittunik misissuileraangata, ilaatigullu aamma aningaaserivinni siunnersortit sullitaminnut tunisassianik tunisartakaminnik tamakkiisumik ilisimasaqarnersut misissorniarlugit. Siumulli ilisimatitsereerluni suleriaatsimi aningaaserivik siunnersortillu piffissaqarluarlutik piareersarfigisartagaat nakkutilliisut allat qimakkiartuaarpaat. Suliffinnik nakkutilliisoqarfimmi tusagassiuutitigut avammut tusarliisarnermut pisortaq Jacob Tangsmark ima nassuiaavoq:
- Siullermik siunertaasarpoq Suliffinnik nakkutilliisoqarfik orniguttassasoq suliffimmi atukkat piffissami tassanerpiaq qanorpiaq isikkoqarnersut takuniarlugit, taamaattumillu siumut kalerreeqqaarata orniguttarluta, tamannalu aaqqissuussineruvoq nutaangajak januaarip aallaqqaataani 2005-imi atulersinneqartoq taamanikkumillu sulinitsinni malittarisarput.
Aningaasaqarnermut nakkutilliisoqarfiup misissuiartortarneri piffissaajaataasutut Atuisartut siunnersoqatigiivini aningaasaqarnermut paasisimasallip Carsten Holdumip taavai, taakkua takkunnissartik nalunaarutigisarmassuk.
- Ajornartorsiutit atuisartunit misigineqartartut paasiniarneqassappata, taava atuisartunut atugassarititat naapertorlugit takkuttoqartariaqarpoq, tassa imaappoq kalerreeqqaarani takkulluni pissusiviusullu takullugit imaluunniit allatut misissuilluni, soorlu atuisartut qanoq misigisaqartarnersut apersorlugit.
