Aningaaserivik timersortartunik tapersersuiuarsinnarpoq

Grønlandsbanken-ip ullumi atsiorpaa Elite Sport Greenlandip timersortartuutaanut pikkorivissunut aningaasaliisutut pingaarnertut ukiuni pingasuni tullerni inissisimanissani. Isumaqatigiissut ukiumut 125.000 koruuninik naleqarpoq.
Allattoq Najaaraq Egede
decembarip 02-at 2010 15:33

Grønlandsbanken Team Grønland-iusimasumut, maanna Elite Sport Greenland-inngorsimasumut, ukiorpassuarni aningaasaliisartuuvoq. Maanna aningaasaliisartutut isumaqatigiissut ukiuni 2011-miit 2013-imut sivitsorpaa.

Elite Sport Greenland taamaalilluni inuusuttut sullinnerannut ukiuni pingasuni tullerni ernumasariaaruppoq.

- Elite Sport Greenland-imit Grønlandsbankenimut isumaqatigiissutitta ukiunut pingasunut atuuttussamik nutarsarnera assut nuannaarutigaarput. Aningaaserivik nunatsinni annersaasoq inuiaqatigiinni suliniaqataalluartoq taamaalilluni aamma timersornermi tapersersuiuarnini takuteqqippaa. Sulisuisa suliatik suusut ilisimalluinnarpaat, taamaammat Grønlandsbankenip aningaasaliisutut pingaarnertut inissinneratigut suleqatigiinnerput ingerlaqqissamma tulluusimaarutigeqaarput, Elite Sport Greenland-ip siulersuisuini siulittaasoq, Finn Meinel oqarpoq.

Team Greenlandiusimasoq Tele Greenlandimut ukiunut pingasunut tullernut atuuttussamik novembari qaammat aamma isumaqatigiissusiorpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq