Aningaaserivik akerliussutsimik takutitsiffigineqarpoq

Sila pillugu isummaminnik ersersitsiniartartut aqqaneq-marluk Skotlandimi illoqarfiit pingaarnersaanni, Edinbourghimi, akerliussutsimik takutitsisut, ippassaq parnaarukkallarneqarput.

Sila pillugu isummaminnik saqqummiussisartunit 100-nit sinnilinnit, Royal Bank of Scotland ippassaq isaaffigineqarpoq. Taakku qaqortunik atukkersorsimallutik imerpalasumik suugaluarnersumik, uuliamulli assingusinnaasumik, aningaaseriviup qullersaqarfianut milloorput, igalaallu marluk aamma aserorlugit.

Cairn Energyp Edinbourgip qeqqani allaffeqarfiat imerpalasumik uuliamut assingusumik aamma milloorneqarsimasoq, aviisimi The Herald Scotlandimi allaaserineqarpoq.

- Suliffeqarfiit Cairnitut ittut aningaaserivimmit Royal Bank of Scotlanditut ittunit aningaasaliiffigineqanngikkunik Issittumi qillerisinnaanngikkaluarput. Aningaaseriviup taassuma qassissaa takutilerpaa uuliasiortut- gassisisiortullu ikinngutiginerpaagini!

Sila pillugu suliniaqatigiiffik, Platform Adam Ma'nit aviisimut The Herald Scotlandimut oqarpoq.

Sila pillugu isummaminnik ersersitsiniartartut Edinbourghimut pingasunngormat tikipput, aningaaseriviullu qullersaqarfiata silataanut ingerlaannnaq inissillutik.

Ippassaq pisut pissutigalugit qullersaqarfini Royal Bank of Scotlandip matusariaqarsimavaa, sulisunilu angerlartiinnarlugit.