Aningaaserivik ajornartorsiortoq aaqqiissutissamik nassaaqquneqarpoq

Aningaaseriviup siulersuisui sinnerlugit Odd Bjelvågip oqaatigaa, piffissaliunneqartup sivitsorneqarnissaa aningaaseriviup qinnuteqaatiginiaraa.

- Aningaasatigut neriorsuisinnaasunik sapinngisarput naapertorlugu pissarsiniassaagut. Taakkulu piffissaliunneqartup kinguartissinnaanissaanut naammattariaqarput, Odd Bjeldvåg ullaaq manna Ritzauimut taama oqarpoq.

Aamma aningaaseriviup siulersuisuini siulittaasup taassuma Aningaasanik nakkutilliisut nalunaarutaat tupaallaatigeqaa.

- Iliuuserisaat sakkortuumik iliuuseqarnertut isigaara. Isumaqatigiinngittorujussuugatta isertuutissanngilara, Odd Bjelvåg oqarpoq.

Folketingimi illuatungiliuttut immikkullu ilisimasallit ippassaq eqqumiigaat, naalagaaffiup aningaaseriviillu pilersitseqqinnissamut suliffeqarfiutaata Finansiel Stabilitet-ip ukiormanna marsimi Eik Bank 9,1 milliardit koruuninik qularnaveeqqusermagu, maannalu naalagaaffiup suliffeqarfiutaata allap, tassa Aningaasanik Nakkutilliiviup Savalimmiormiut aningaasarsiornikkut tunngaviat peerniarsarilermassuk.

Qularnaveeqqutit pissutigalugit, aningaaserivik aaqqiissutissamik nammineerluni nassaanngippat, naalagaaffiup aningaaserivik ingerlatilersinnaavaa. Aningaaseriviullu piumasaqaataa kingulleq, tassa aningaasat sisamanngornerutinnagu nassaarineqarnissaannik imaqartoq pissutigalugu, Savalimmiuni maanna ulapputtoqarpoq.