Aningaaseriviit issittumi uuliasiorneq mianersoqqussutigaat
Uuliasiortitseqatigiiffiup issittumi uuliamik ujaasiniarnera avatangiisinut illersuiniaqatigiit kisimik assuarinngikkaat, aviisimi Berlingske-mi allaaserineqarpoq.
Aningaaseriviit sillimmasiisarfiillu isumaqataanatik aarlerisaaripput.
Issittumi uuliamik ujaasinissamut aningaasaliiumanani, Tysklandimi aningaaserivissuaq West LB nalunaarpoq, aamma nunarsuarmi sillimmasiisarfiit annersaasa ilaata Lloyds-ip uuliaarluertoqassagaluarpat akiligassaqalernissani aarleqqutigalugu nalunaarutigaa.
- Issittumi ajunaarnersuaqarpat avatangiisinut kingunerisassai allanut sanilliullugit annertunerujussuussapput. Suliffeqarfiit issittumi suliaqartut tusaamaneqarnerannut mianernarsinnaanerat qaninnineruvoq, Llyods nalunaarusiamini taama allappoq.
Pinngortitaq pillugu nunarsuaq tamakkerlugu suliniaqatigiiffik inuussutissarsiutinik suliaqartunik suleqateqartoq, issittumi uuliasiornermut tunngassuteqartunut tamanut isumaqataanngilaq. Issittumi uuliasiorluni qillerinerit unitsikkallarneqartariaqarput, suliniaqatigiiffik isumaqarpoq.
- Issittumi misiliilluni qillerinermi ulorianaatit pinaveersaartinniarlugit iliuutsinik toqqissisimanartunik peqalerpat isumarput allanngorsinnaavoq, Pinngortitaq pillugu nunarsuaq tamakkerlugu suliniaqatigiiffiup Danmarkimi immikkoortortaqarfiani avatangiisit pillugit pisortaq, John Norbo oqarpoq.