Aningaaseriviit arfineq-marluk angusinngitsoorput
Aktianik nioqquteqarfinni appariartoqarujussuaraluarpat, inissarsiornermi ajornartorsiortoqaleraluarpat, oblikationit naalagaaffimmit pisiat nalingisa appariartornerat pissutigalugu nunat arlaat akiligassaqarujussualeraluarpat aningaaseriviit tamanik qaangiisisinnaassanersut uivilinnginnissamut misissuinermi ilaatigut misissorneqarput.
Misissuinermi Grønlandsbanken ilaanngilaq. Danmarkimi aningaaseriviit pingasut, Danske Bank, Jyske Bank aamma Sydbank misissuinermi peqataapput, uparuagassartaqarnatilli. Svenskit aningaaseriviat, Nordea, aamma uparuagassartaqanngilaq.
Aningaaserivinni nutaamik ajornartorsiortoqaqqilissagaluarpat aningaaseriviit arfineq-marluk qaangiinissaminnut amerlanerusunik aningaasaateqartariaqarput. Taakku tassaapput Tysklandimi aningaaserivik, Hypo RealEstate, Grækenlandimi aningaaserivik ATEbank, Spaniami Catalunya Spaniamilu sparekarsit allat sisamat.
Naalagaaffiup aningaaserivissua, Nationalbanken, aamma Aningaaserivinnik nakkutilliisut Danmarkimi aningaaserivinnik ingerlaavartumik namminneq misissuisarput, Grønlandsbankilu tassani ilaavoq. Grønlandsbanken aamma nammineq misissuisarpoq.
Misissuinerilli taakku inerneri pisortatigoortumik saqqummiunneqarneq ajorput. Uuma misissuinerup kingulliup pisortatigoortumik saqqummiunneqarneranut pissutaavoq, aningaasarsiornikkut ajornartorsioreernerup kingorna Europami aningaaserivinnik tatiginneqqilernissaq.
Europami børsit sapaatip akunnera naatinnagu ullumi matoreermata misissuinerup inerneri aatsaat saqqummiunneqarput. Aningaaserivinni qaqisinngitsoortuni aningaasaatit ataasinngornerutinnagu iluarsiniarneqarnissaat ulapputigineqassagunarpoq.