Aningaaseriveqarnikkut pissutsit ernummatigineqartariaqanngillat

Kalaallit Nunaanni aningaaseriveqarnikkut pissutsit Unammilleqatigiinnermut ataatsimiititaliamit ernumanartutut isigineqarnikuupput. Unammilleqatigiinnermulli ataatsimiititaliap Atuisullu sinniisaasa inatsisilerituuat Nikolai Odgaard Jensen oqarpoq misissuinerup kingulliup takutikkaa ernumasoqartariaqanngitsoq.
oktobarip 09-at 2007 11:45

Unammilleqatigiinnermut ataatsimiititaliami fuldmægtigi Nikolai Odgaard Jensen oqarpoq Kalaallit Nunaanni aningaaseriveqarneq pillugu 2004-mi nalunaarusiorsimallutik 2001- mi nalunaarusiarineqareersoq qalleqqissarlugu nalunaarusiornerminnilu Kalaallit Nunaanni aningaaseriveqarnermi pissutsit Danmarkimi Savalimmiunilu aningaaseriveqarnermi pissutsinut naleqqersuussimagitik. –Kalaallit Nunaanni aningaaseriviit eqqarsaatigalugit ernumakujussimavugut taamani Grønlandsbanken kisermaassipajaartutut inissisimammat Sparbank Vestili takkummat qujanartumik unammilleqatigiittoqalerpoq sulliveeraatilinnut kiffartuussineq eqqarsaatigalugu, Nikolai Odgaard Jensen oqarpoq. Nikolai Odgaard Jensen oqarpoq Kalaallit Nunaanni sumiiffinni assigiinngitsuni kiffartuussineq eqqarsaatigalugu assigiinngiinngitsisoqarnersoq misissorneqarnikuunngitsoq. – Kalaallit Nunaalli unammillerfittut ataatsimut isigalugu naliliivugut sinerissami najugaqartut Nuummiunut naleqqiullugit ajornerusumik pineqanngitsut, Nikolai Odgaard Jensen oqarpoq. Unammilleqatigiinnermut ataatsimiititaliaq Atuisullu sinniisui allaffeqatigiimmata Nikolai Odgaard Jensen aperaarput, aningaaseriviit inuttarsiuillutik kiffartuussisarnerinnut tunngasunik naammagittaalliortoqarsimanersoq. – Naagga, Atuisut sinniisoqarfianni immikkoortitsisoqarsimaneranik naammagittaalliorfigineqanngisaannarpugut, Nikolai Odgaard Jensen oqarpoq.

Siumup inatsisartuni ilaasortaatitaasa Kalaallit Nunaanni sillimmasiisarfittalimmik aningaaserivilioqqullugit Naalakkersuisut peqquaat, isumaqaramik aningaaseriviit pioreersut sumi najugaqarneq tunngavigalugu immikkoortitsisartut.