Aningaaseriiviit naalagaaffimmut atorniarsinnaanerat misissorneqarpoq
Aningaaseriviit atoriaannarnik aningaasaateqarnissaat qulakkeerniarlugu danskit naalagaaffiat 100 milliardi koruuninik aningaasaliivoq. Danskit naalagaaffiata neqeroorutaata Kalaallit Nunaannut atuutsinneqarnissaa naalakkersuisut isumaqatigaat, aningaaseriviit atorniarsinnaanerannut Kalaallit Nunaanni aningaaseriviit ilannguttariaqartut oqaatigalugu. Danskit naalagaaffiata neqeroorutaanut kalaallit Nunaat ilannguttariaqartoq innersuussutigaarput, aningaasaqarnermut naalakkersuisoq Per Berthelsen oqarpoq, naalakkersuisut siulittaasuata Hans Enoksenip partiit allat sapaatip akunnerata naanerani oqaloqatigai partiillu amerlanerit tapersersuipput, Kattusseqatigiit kisimik pinnatik Per Berthelsen oqarpoq.
Kalaallit Nunaanni aningaaseriviit isumannaatsumik ingerlaannarnissaat qulakkeerniarutsigu piaartumik qanoq iliuuseqartariaqarpugut.
Inatsisartut aningaasaqarnermut ataatsimiititaliaa inatsisartut sinnerlugit apeqqutip akissuteqarfigissagaa siunnersuutigaarput, Per Berthelsen oqarpoq.
Naalakkersuisut siunnersuutissatut saqqummiussaat aningaasaqarnermut ataatsimiititaliap sapaatip akunnerata naanerani tigussavaat.
Naalakkersuisut innersuussutissatut saqqumiussaat aningaaseriviup Grønlandsbankip pisortaanit Martin Kviesgaard-imit tapersersorneqarpoq.
Danskit naalagaaffiata aningaaserivinnik atukkiinissamik neqeroorutaa Kalaallit Nunaanut atuuttunngornissaa pisariaqarpoq.
Maannakkulli aningaaserivimmi Grønlandsbank-imi periarfissaq tamanna atussanerlutigu suli aalajanginngilagut, Martin Kviesgaard oqarpoq.
Neqeroorut aningaaserivinnut aningaasaqarnikkut ajornartorsiuteqartunut suliaavoq, uagullu Grønlandsbankimi aningaasaqarnikkut ajornartorsiuteqanngilagut taamaattumillu periarfissap taassuma atornissaa naatsorsuutiginngilarput. Periarfissarli tamanna atuummat ajunngilaq, aningaaseriviup Grønlandbankip pisortaa Martin Kviesgaard radioaviisimut oqarpoq. Savalimmiuni aningaaseriviit danskit naalagaaffiata atorniarsinnaanermik neqeroorutaanut ilanngussinnaasut ministeriuneq Anders Fogh Rasmussenip ullumi oqarpoq. Aningaaseriviit pillugit isumaqatigiinniartoqarmat Savalimmiormiut naalakkersuisui ilaatinneqarsimannginnerisa isornartorsiorneqarnerata kingorna.
