Aningaasatigut ajornartorsiornerup Kalaallit Nunaat eqqorsinnaavaa

Kalaallit Nunaanni aatsitassanik piiaanissamik suliniutit ajunngitsumik ineriartortinneqarput, ungasinnerusorli, imaluunniit maannakkut suliniutit annertoorujussuit eqqarsaatigalugit, nunanit allanit aningaasaliiffigineqarnissaat ajornakusoornerulissaaq, Grønlandsbankip pisortaa naliliivoq.

Alcoap alumiiniumik aatitsiviliornissaa, taamatullu erngup nukinga atorlugu nukissiorfiliornissamut annertuumik aningaasaliinissat, matumani eqqarsaatigineqarput.

Suliniutit tamakkua piviusunngortinneqarnissaannut nunani allani taarsigassarsisitsisartut aningaasaliisartullu mianersornerulernermik nalaanneqarsinnaasut Martin Kviesgaard oqarpoq, politikkerillu mianersornissaannik oqariartuuteqarluni. Aatsitassanik ujaasinerit piiaffiliornernik kinguneqarluarsinnaapput, nunarsuarmili aningaasarsiornerup ajornartorsiornerani suliniutit kinguartinneqarsinnaapput aningaasarsiornerlu pitsaasumik ingerlalerpat suliniutit ingerlanneqarlutik.

Danmarkimi nunarsuullu sinnerani aningaasatigut inissisimaneq Kalaallit Nunaannut annikitsuinnarmik sunniuteqaraluartoq nunarsuup sinnerani aningaasarsiornerup annikilliartornerata Kalaallit Nunaat siunissami eqqorsinnaavaa, Martin Kviesgaard oqarpoq, “isumaqarpunga naalakkersuisut aappaagumut aningaasanut inatsisissamut siunnersuutaanni tamanna eqqarsaatigisimanngikkaat", GrønlandBankip pisortaa, Martin Kviesgaard, oqarpoq.