Aningaasat taarsertinniarlugit eqqartuussivilersuussipput
Jens Napãtôk' ullaaq manna 126.366 koruuninik ilassinnissutinik atornerluisimasutut pineqaatissinneqarpoq, Namminersornerullutik Oqartussaniilli aningaasanik amerlanerusunik taarsiivigitinnissaq kissaatigineqarpoq.
Namminersornerullutik Oqartussat Jens Napãtôk' Eqqartuussivimmut aggeqqusissummik ukioq kingulleq nassippaat. Taamani 191.000 koruunit taarseqquneqarput, kingornalu taakku 186.000 koruuninut apparneqarput.
Eqqartuussivimmi saqitsaattut suliarineqarnissaat maajimi ukioq manna naammassineqareertussaagaluartoq kinguartinneqarnikuuvoq, Jens Napãtôk' ilassinnissutinik atornerluisutut eqqartuussivilersuunneqarnerata naammassineqarnissaa utaqqineqarmat.
Maanna suli suliaq qaqugu eqqartuussivimmi suliarineqassanersoq, akerleriilluunniit naapillutik oqaloqatigiissanersut piffissalerneqarnikuunngilaq, eqqartuussisuuneq Søren Søndergård Hansen oqarpoq.
