Aningaasat qinnutit akuerineqarput
Inuiaqatigiinni suliassat aningaasaliiffissallu qinersineq pissutigalugu utaqqitinneqarsinnaanngitsut immikkut aningaasaliifigineqarnissaannik Naalakkersuisut kissaataat Inatsisartut ullumi ataatsimiineranni oqaluuserineqarpoq.
Inuussutissarsiornikkut siuarsaanissamut Pisortaqarfiup suliuniataanut, suliffeqarnikkut nutarterinermut atatillugu kommuneqarfiillu ilitsersuivinnik ilisimatitsivinnillu pilersitsinissaannut, Paamiuni mittarfissap suliariumannittussarsiuunnissaanut Paamiunullu timmisartoqartitsinikkut Air Greenlandimut isumaqatigiissutip matussuserneqarnissaanut, Sisimiuni erngup nukinga atorlugu nukissiuuteqarfiliornissap nanginneqarnissaanut, Utoqqarmiut Kangerluarsunnguanni turbinit pingajussaata atulersinneqarnissaanut. Qaanaap Ittoqqortoormiillu kommuneaniit timmisartukkut angallassinermut tapiissuteqarnissamut, kiisalu nunarsuarmi niuernikkut suliniaqatigiiffissuarmi WTO-mi nunatta nalunaarsugaalernissaanut, akissaajaataasussallu eqqarsaatigalugit sillimmatissanut, katillugit 27 million koruunit missaanniittut naalakkerusisunit kissaatigineqartut, Inatsisartuni amerlanerussuteqartut ullumi akuersissutigaat. Aningaasarpassuit sumit aaneqassappat, Aningasaqarnermut Naalakkersuisutut ingerlaqqittoq Josef Motzfeldt ima akivoq:
- Pingaaruteqarpoq aningaasat sanaartugassallu inuiaqatigiinni atorneqartut peqqissaaffaarilluni tulleriaarneqarnissaat. Tamanna pillugu ukiuni tullerni aningaasatigut sipaarutaasinnaasut siunnerfigalugit, kiisalu inuiaqatigiit suliffissaqarnikkut unittuuinnginnissaat isumagisassallu allat kinguaattuunngissaat pillugit aningaasat takku pisariaqarluinnarput.
Aningaasartuutissatut kissaatit aappaagu aningaasartuutitigut missingersuutinit tiguneqareersut Aningaasaqarnermut Naalakkersuisoq oqarpoq.
- Inuutaasut akileraarutaasigut isertitassanit Danmarkip ukiumoortumik aningaasaliissutissaanit kiisalu EU-p imartatsinni aalisarsinnaanerminut akiliutissaanit aaneqareerput.
Josef Motzfeldt oqarpoq Inatsisartut aappaagu 2006-imi Aningaasanut Inatsisissamit katillugit 5,5 milliarder koruuninik atugassaqartut.