Aningaasat piginasorisani agguaappai

Angutip suliffeqanngitsup Nanortalimmi najugallip, sapaatip akunneri kingulliit pingasut aningaasat 1,3 millioni koruunit piginasorisami ilai atorluarpai.

Angut Danmark-imi aningaaserivimmit BRF Bank-imit sapaatit akunneri pingasut matuma siorna allagarsivoq, aningaasat 1,3 millionit koruunit angutip taassuma kontoani uninngasuutigineqartut pillugit.

Aningaasat taamak amerlatigisut ilumut uningaasuutiginerlugit uppernarsarniarlugit aningaaserivimmut BRF bank-imut sianermat aningaaserivimmit ilumoornerarneqarpoq.

Aningaaseriviup tamanna kukkussutaannginnerarlugu uppernarsareermagu, angutip Nanortalimmeersup 1,3 millonit koruunit Kalaallit Nunaanni aningaaserivimmut nuunneqarnissaat piumasarivaa, taamaaliorpullumi.

Angut taanna isumaqarsimavoq, eqquiniaanermi klasselotterimi eqquisimalluni.

Nanortalimmi politiit pisortaat radioaviisimut oqaluttuarpoq, angutip aningaasarpassuarnik eqquinasorisup aningaasat 450.000,00 koruunit sapaatip akunnerini pingasuni kingullerni atorsimagai. Ilaatigut 30.000,00 koruuninik akilimmik angallatisisimavoq, ilaquttani tamaasa oqarasuaatinik angallattakkanik atisanillu nutaanik pitsissorsimavai, aningaasassaaleqisullu 500 koruuninik 1000 koruuninillu tuniorarsimallugit. Aningaasarpassuarnilli atuineq tamaanga killeqarpoq.

Danmarkimi aningaaserivimmi BRF bank-imi kukkusoqarneratigut angutip taassuma inuttut normua atorneqarsimasoq paasineqarpoq.

Angallat angutip pisiarisimasaa politiinit arsaarinnissutigineqarpoq, taamatullu qarasaasiaq TV-lu atorlugu pinnguaat arsaarinissutigineqarlutik.

Aningaasat kikkunnut tamanut tunniussuunneqartut qanoq ilillugit utertinneqarsinnaanersut ilisimaneqanngilaq. Aningaaseriviup BRF bank-ip aningaasat kukkulluni angutip kontoanut ikineqarsimasut atorneqarsimasullu utertinniartussaassavai, angulli taanna aningaasaateqanngilaq.

Angut taanna aningaasanik nammineq pisuussutiginngisaminik atornerluisimasutut Nanortalimmi politiinit pasineqartoq radioaviisimit oqaaseqartinniarsimagaluarparput, oqaaseqarusussimanngilarli.

Taamatuttaaq BRF bank kukkusimaneq pillugu radioaviisimit oqaaseqartinniarsimagaluarparput, inunnulli ataasiakkaanut tunngassuteqartunik oqaaseqarsinnaannginnerarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat