Aningaasat millionit tunissutit nunaqarfimmiunut iluaqutissat
Suliniut "Nunaqarfinni ilinniartitsinikkut kivitsineq", naatsunngorlugu NUIKI, taamaasilluni pilersinneqarpoq, Itillimilu atuarfimmi siorna septembarimi aallartinneqarluni. NUIKI-mik pilersitseqataasoq Palle Lennert ima oqarpoq:
- Inuusuttut inuttut iluitsutut periarfissillugit, piareersarlugillu ilinniagaqalernissannut, taamatut naatsumik oqaatigalugu, "Nunaqarfinni ilinniartitsinikkut kivitsineq"-mik pilersitseqataasoq Palle Lennert oqarpoq.
Aningaasat suliniummut NUIKI-mut tunissutaasut ukiunut tallimanut naatsorsuussaasumi nunaqarfinni arlalinni atuaqatigiiaanik aqqaneq-marlunnik 15-inik atuartulinnik pilersitsinernut atorneqassapput, atuartullu 10. klassep nalinganik kalaallisut, qallunaatut, tuluttut matematikkimillu ukiup ataatsip iluani atuartinneqartassallutik.
Suliniut meeqqat atuarfii, Piareersarfiit, kommunit Namminersorlutillu Oqartussat suleqatigiillutik kivissavaat, atuartussallu aallartinnginnerminni oqaloqatigineqaqqaartassapput, inuillu toqqarneqartut, suliffeqalernissaat, ilinniakkamilluunniit aallartitsinissaat anguniagaalluni.
- Inuit ajunngilaq ajornartorsiuteqaraluarunik, kisianni ajornartorsiutit qaangigassaapput, imaluunniit unammilligassat qaangigassaapput. Oqariartuullu taanna aallaavigalugu suleriaaserput tunngaveqartorujussuuvoq, Palle Lennert oqarpoq.
Atuartut 15-it Itillimi siorna aggusti naalersoq aallartipput, aqqaneq-marlullu soraarummeerput, ilinniagaqalernissamullu piareerlutik, Niaqornaarsummilu atuartut 15-iugaluariarlutik maanna 16-inngorsimasut, Palle Lennertip oqaatigaa.
Atuartussat apriilimi maajimiluunniit piareersalereertarput, atuartussallu nalunngereertussaavaat septembarimi atualerunik suut piareersimaffigissanerlugit, nunaqarfimmiullu ilinniagaalernissaminnut piumassuseqartorujussuusut, Palle Lennertip oqaatigaa:
- Itillimiikkuit, Niaqornaarsummiikkuit nunaqarfimmiluunniit allamiikkuit atuarsimallutillu, sumiluunniit, Nuummi, Sisimiuni Københavnimiluunniit atuarsinnaavutit piumassuseqarlutit ukua aqqusaarsimagukkit, "Nunaqarfinni ilinniartitsinikkut kivitsineq"-mik pilersitseqataasoq, isumaginninnermut siunnersorti Palle Lennert oqarpoq.
NUIKI ukiut marluk qaangiuppata nalilersoqarumaarpoq, ingerlaqqissanersoq aalajangerneqassalluni. Ingerlaqqissappallu pilersaarutaavoq ukiuni pingasuni ingerlassasoq, Namminersorlutillu Oqartussat taassuma kingorna aqutsisuussallutik.
