Aningaasat katersat ilimagisamit amerlanerunerat periarfissanik nutaanik ammaassivoq
Aningaasat NAKUUSA-p meeqqanik inuusuttunillu kinguaassiutitigut atornerluisarnermik akiuiniarneranut atorneqartussat ippassaq tallimanngornermi katersorneqarput, aningaasallu ilimagisamit amerlanerusut katersorneqarput, NAKUUSA-llu tamanna soorunami nuannaarutigaa:
- Ilimagisatsinniit angusarissaarnerujussuuvugut, nuannaaqaanga, kisianni ullumikkut aamma qasulaarpunga, Arnavaraq Jørgensen, Unicef Danmarkimi atorfilik, oqarpoq. NAKUUSA-p Unicef Danmark suleqatigivaa.
AAMMA ATUARUK Nuna tamakkerlugu katersuiniarnermi ilimagisat qaangerneqartut
Aningaasat aatsaat taama amerlatigisut katersorneqarput
Aningaasat 1.655.892 koruunit ippassaq unnukkut katersorneqarput, ilimagisamiillu millionip affaasa missaannik amerlanerusunik katersisimallutik, Arnavaraq Jørgensenip oqaatigaa.
Aningaasat katersat, meeqqat kinguaassiutimikkut atornerlugaasimanerinik pasitsaassaqarnermi angajoqqaanut inersimasunullu qanigisaasunut qanoq iliuuseqarnissamut paasissutissanik suliaqarnissamut atorneqassapput.
- Paasisitsiniaanerit pillugit kingorna paasiniaagaangatta takusinnaavarput paasissutissat innuttaasunut annerusumik apuunneqartartut. Innuttaasut akornanni 80 aamma 90 procentiisa akornanniittut paasisitsiniaarnermi oqaatiginiakkavut ilisimasarpaat, Arnavaraq Jørgensen oqarpoq.
Sumiiffinni ataasiakkaani suliniuteqarsinnaassagunarpoq
Aningaasat ippassaq katersorneqartut 1,6 millionit sinnerpaat, inuttaasullu ataatsip agguaqatigiissillugit immikkut 29 koruuninik tunissuteqarpoq. Danmarkimut katersinermut kingullermut sanilliukkaanni marloriaatingajammik amerlanerupput, Danmarks Indsamlingimik taallugu katersisoqarmat innuttaasoq agguaqatigiissillugit 16 koruunit missaannik tunissuteqarami.
Aningaasat NAKUUSA-mit ippassaq katersorneqartut ilimagisamit amerlanerummata maanna apeqqutaalerpoq aningaasat tamakku suliniutinut sunut atorneqassanersut:
- Apeqqut massakkorpiaq akissallugu sapernarpoq. 1 millionit koruunit missaannimmi katersisinnaanissarput neriuutigigatsigu. Sumiiffinnili ataasiakkaani suliniuteqarsinnaanissarput eqqarsaatersuutigaara. Aningaasammi ilimagisamit amerlanerusut katersorneqarneranni periarfissat allat ammaassiffigineqarput, nuna tamakkerlugu suliniuteqarnitsinnut ilassutissanik periarfissiilluni, Arnavaraq Jørgensen, NAKUUSA-meersoq, oqarpoq.
