Aningaasat assitassaat

Aningaasaatigiligassagut massakkut inuusunik assiliartalersugaanatik pinngortitaminngaaneersunik assitaqarnerussapput.

-Eqqumiitsuliortunik suleqatigiittussanik pilersitsissaagut, tassanilu siunnersuutit nalilersorneqassapput, soorlu pinngortitamut inunnullu tunngasut tamarmik nalilersorneqassallutik. Qularnaapporli kalaalerpaluttuunissaat, Hans Enoksen oqarpoq.

Namminerli assiliartaanissani siunertaanngilluinnartoq aamma oqarpoq.

-Uanga tamanna angunianngilluinnaqqissaarpara, kisianni nunatsinnut inuit sunniuteqarsimasut soorunami eqqarsaatitsinnut ilaapput, soorlu taalliortorsuagut, kulturitsinnut annertuumik nukittorsaaqataasimasut, toqukkulli qimagutereersimasut, Hans Enoksen oqarpoq.

Naalagaaffiup Aningaaserivissuata pisortaata, Torben Nielsenip, oqaluttuaraa, aningaasat massakkutut angissuseqaannassasut tallimanillu assigiinngitsunik qalipaateqassasut, qalipaataali ullumikkut qalipaatigineqartunut assingusariaqanngitsut. Namminersornerullutik Oqartussat aningaasat assiliartassaannik aalajangiisussanik suleqatigiissitaliussaaq, taakkuussappullu aamma assitaliortussanik toqqaasussat.

Aningaasat aggorsimasortai ullumikkutut isikkoqaannassapput.

Aningaasat januaarip aallaqqaataani 2008-mi atulissapput, tassa ukiut marluinnaat qaangiuppata.