Aningaasarsiornikkut ajornartorsiorneq Grønlandsbankip malugaa

GrønlandsBankip qaammatit pingasukkaartumik naatsorsuutaani erserpoq qaammatini qulingiluani siullerni isertitat siornamut naleqqiullugu ikinnerusut. Akilerarutit peernagit ukioq manna maannamut isertitatut atukkat 62,3 millioni koruuniupput, siorna taamaalinerani 88,9 millioni koruuniullutik.
Allattoq Louise M. Kleemann
oktobarip 29-at 2008 10:38

Isertitat ikileriarnerannut pissutaanerpaavoq aktiat oblikationillu nalikillisimammata. Isertitat 5,9 procentimik annertusigaluartut taakkununnga aningaasartuutit akiligassanullu atukkat 6,7 procentimik siornamut naleqqiullugu annertunerusimapput.

Aningaaseriviup atukkiussaanut taarsersukkat katillutik maannamut 2 millioni kr.-iupput siorna taamaalinerani 5,9 mio. kr.-iullutik. Taakkua nunatsinniinnaq atugaapput.

GrønlandsBankip aningaasaqarnera suli ajunngilluinnarpoq isertitatigut sinneqartoorutaasut malunnaataalluarmata aningaasanillu uninngasuuteqarnermi, inatsisitigut maleruagassat malillugit uninngasuutigisinnaasatut amerlassusii 142,3 mio. kr-inik amerlanerummata.

GrønlandsBankimi siulersuisut nalunaarutigaat nunani tamalaani aningaasarliorneqaraluaqisoq aningaaseriviup tunngaviusumik isertitai naammagisimaarnaluartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq