Aningaasarsiornermik sulialik: Niueqatigiinnikkut amigartoorutit siunissami mianersoqqussutaapput
Nunanit allanit 4,4 milliardi koruunit nalingannut siorna pisivugut, uagullu 2,5 milliardi koruunit nalingannut tunisaqarluta.
Kisianni siunissami qaninnermi annerusumik sunniuteqaratik, ungasinnerusorli isigalugu mianersoqqussutaasut, Nunamineralsimi aningaasaqarnermut pisortaq, Martin Ben Shalmi, isumaqarpoq. Taanna Nunatsinni ukiuni 15-ini aningaasarsiornermik assigiingitsutigut sammisaqarnikuuvoq.
- Kalaallit Nunaat Danmarkimit ataatsimut tapiissutinik 3,4 milliardi koruuninik pisarpoq. Nunanik allanik niueqateqarnitsigut 2,5 milliardi koruunit siorna isertippavut, taamaalillutalu 5,9 milliardi koruunit siorna atorsinnaasimavavut. Taava apeqqutavoq, aningaasat qanoq atornerivut. Piisaarnermut atorpavut, imaluunnit siunissamut upalungarsarluta atorpavut?
Maluginiarparalu assersuutigalugu imigassamut tupanullu atukkavut, ukiup siulianit naleqqiullugit 35 millioni koruuninik amerlanerupput. Ataatsimulli isigalugu pitsaasumik atuisimasugut isumaqarpunga, Martin Ben Shalmi oqarpoq.
- Kisianni ukiuni amerlavallaani amigartooqattaarnaveersaartariaqarpugut. Taamaalioruttami Danmarkimit ataatsimut tapissutit nungukkiartupiluussavavut. Ukioq manna amigartoorneq mianersoqqussutitut isigisariaqarpoq aperaluni, aningaasanuku sumut atorniarivut? Martin Ben Shalmi aperivoq, siunersuutigaalu, aningaasat suliniutinut ataqqinaataasinnaasunut atunngikkallarlugit, suliutinut attaveqatigiinnermut iluaqutaasussanut, taamaalillunilu aningaasartuutikillisaataasussanut, atorneqassasut, taamaaliornikkut ingerlatitsinermut aningaasartuutit ikilissammata.
Martin Ben Shalmi isumaqarpoq, Kalaallit Nunaata aningasaqarnera ataatsimut isigalugu pitsaasuusoq.
Kisianni nassuerutigisariaqartunik ajornartorsiuteqarnerarpaa.
Politikerit siunnersorusuppakka, ingerlatsinermut aningaasartuutit ikilisinniaqqullugit, Martin Ben Shalmi oqarpoq.
Uuliasiortunik aatsitassarsiortunillu sulllissisinnaanerulerluta ineriartortitsisariaqartugut, Martin Ben Shalmi isumaqarpoq, taamaalilluta pisuussutinik aniasoqarneranut taarsiullugu Nunatsinni nalilinnik pilersitsisinnaalerniassagatta.
