Aningaasarsiornera tukalluinnarpoq
Tamanna kommunip kukkunersiuisuata ukiup siulianut oqaaseqaataani Sermitsiap misissorsimasaani takuneqarsinnaavoq.
Meeqqanut inerteqqutaavoq. Tusagassiortup Sermitsiameersup Kommuneqarfik Sermersuup naatsorsuutaasa 2009-meersut kukkunersiuisunit misissorneqarnerat atuareerlugu taama oqarpoq.
Kukkunersiuineq kukkunersiuisunit Deloittemeersunit ingerlanneqarpoq, unioqqutitsinerillu annikitsuunngitsut naammattoorneqarlutik. Ilaatigut kommunip aningaasiviani imaqanngereeqisumi 160.000 kr.-it amigaatigineqarput. Tamatumunnga pissutaavoq Kommuneqarfik Sermersuup nammineq kommunalbestyrelsiani ilaasortat sisamat tamarmik ataatsimut namminneq kommunerisaminnut 160.000 kr.-inik akiligassaqarmata. Pisuni arlalinni kommunip akiligassat taakkuusut marloriarluni akilertarsimavai. Immikkoortortaqarfiit ilaanni kommunimi sulisut akeqanngitsumik biileqartitaapput, akeqanngitsumik telefoneqarlutik kiisalu feeriarluni akiliunneqarluni angalasarnerit nalunaarutigineqartarsimanatik. Taamaaliorneq inatsisinik unioqqutitsineruvoq, kommunilu akileraarutitigut isertitassani arlaqartuni imminut sianiinaartarsimalluni, tamannalu taamaalilluni innuttaasut sullinneqarnerannik pitsaannginnerulersitsilluni. Kommunip inuit amerlaqisut kommunimi suliunnaariikatassimasut akissarsisittarsimavai.
Innuttaasuni arlaqartut ineqarnermut tapiissutinik pissarsisarput, naallu innuttaasut ima akissarsiaqartigigaluarlutik ineqarnermut tapiissutinik pissarsisussaatitaanatik, Sermitsiaq nalunaarpoq. Aammattaaq Kommuneqarfik Sermersuumi sulisut arlallit Danmarkimut akiliunneqarlutik feeriareersimagaangamik akiliisimanermut uppernarsaatit iluarsaannerannut pikkorivittarsimapput. Inatsisit unioqqutillugit taakkua ilaasa biilinik attartorneq, hotelimi najugaqarneq Spaniamullu angalanerit kommunimut akilersittarsimavaat.
Kommunimi sulisut pikkorissariartorlutik angalagaangamik taakkua ilaat pissuserissaaratik angalasarsimapput. Tassami taakkua piffissaq iluatsillugu ilaquttatik pikkorissariartornerminni ilagisarsimavaat taamaalillutillu Kommuneqarfik Sermersuumi innuttaasut akileraartartut aningaasartuutinut taakkununnga akiliisussanngortittarlugit.
- Pikkorissariartorluni angalanerit sulisunuinnaq pisiarineqartariaqarput, tamatumalu kingornagut ilaquttamik pikkorissariartornerminni ilaginerat namminneerlutik akilertariaqarlugu, Sermitsiap allaaserisaa naapertorlugu Deloitte erseqqissaavoq.
Kommuneqarfik Sermersooq siorna 50 mio. koruuninik amigartooruteqarpoq.
