Aningaasarpassuarnik nassaartoqareersorlu inuit marluk tigusarineqartut
Aalborgimi Grønlandshavnenimi ilanngaaserisut nalinginnaasumik sulinerminnut atatillugu misissuimmata uissuumminartumik nassaarput, aningaasammi 7,7 millionit koruunit qerititat akornanni nassiunneqarsimasut nassaarivaat.
Inuit marluk Kalaallit Nunaanni maanna tigusarineqarput.
AAMMA ATUARUK Akitsuuserisut talittarfimmi 8 miliuunit missaat qerisunut puussiani nassaaraat
Kalaallit Nunaanni Politiini vicepolitiinspektøri Jana Lambertsen KNR-imut taama ilisimatitsivoq:
- Inunnik marlunnik Kalaallit Nunaanni tigummigallagartugut ilisimatitsissutigisinnaavara, Jan Lambertsen oqarpoq.
Suliami suli misissuisoqarmat politiit sukumiinerusumik oqaaseqarsinnaanngikkallarput.
Qerisut nassiussat Kalaallit Nunaanninngaanneernersut, Kalaallit Nunaannulluunniit nassiussaanersut Kalaallit Nunaanni Politiit tamanna pillugu oqaaseqarsinnaanngillat, tigusarineqartullu qanoq unnerluutigineqarnersut ilisimatitsissutigisinnaanagu.
Nalinginnaasuunngitsumik nassaartoqartoq
Aningaasat pinerlunnermeersut arsaarinnissutigineqartarnerat nalinginnaasuusoq Jan Lambertsenip oqaatigaa, aningaasalli taama amerlatigisut nalinginnaasuunngilaq.
- Aningaasat matumani pineqartut amerlassutsimikkut soorunami nalinginnaasuunngilaq. Aningaasanik arsaarinnissutugineqartut pinerlunnikkut pissarsianik malunnarunnaarsaaniarnermeersuukkajupput, peqquserluttuliornermeerlutilluunniit. Aamma ikiaroornartumik anngiortumik eqqussuinermeersuusinnaapput, Jan Lambertsen oqarpoq.
Inuit marluk suliamut atatillugu tigusarineqartut, inatsit tunngaviusoq naapertorlugu matoqqasumik killisiorneqareerput.