Aningaasarliorneq pinngitsoorneqarsimasinnaagaluarpoq

Amerikami inatsisartut aningaasaqarnikkut ajornartorsiornerup aallartinnerata nalaani pisut pillugit nalunaarusiaq maannakkorpiaq Washingtonimi saqqummiuppaat.

Tassani politikerit, qullersat, Wall Streetimilu pappiaqqanik nalilinnik nioqquteqartartut sakkortuumik isornartorsiorneqarput.

Aningaasaqarnikkut ajornartorsiorneq pappiaqqallu nalillit Wall Streetimi nalikillinerujussuat pinngitsoortinneqarsimasinnaagaluarpoq. Amerikamiut inatsisartuisa qulaajatitsinerannit nalunaarusiami tamanna atuarneqarsinnaavoq. Qulaajaasut nalunaarusiaat aviisimi New York Timesimeersut atuarsinnarlugu oqaatigaat qullersat assigiinngitsut aningaasaateqarfiillu nalunaarusiami pisuutinneqartut. Amerikami qitiusumik aningaasaateqarfiat kiisalu Buship Clintonillu præsidentiuneranni allattoqarfiit akuersarpallaarnerisigut suliariniakkat nakkaattooriaannaat aningaasalersorneqartarsimapput, kiisalu aningaasaliisarnernik nakkutilliisussat politikkikkut piumassuseqannginermikkut nakkutigisassatik killilersortarsimanngilaat. Tamatuma kinguneraa assigiinngitsutigut peqqarniitsumik iluanaarniapiluttut aningaasaateqarfinnik atuipiluttarnerat.

Nalunnginnittut kinaassutsiminnik oqaatiginnerusunngitsut internetaviisimut Huffington Postimut oqaatigaat Wall Streetimi atorfillit nuimasut nalunaarusiami inatsisaatsuliorsimaneragaasut. Taamaammat qulaajaasut nalunaarusiartik USA-mi Inatsiseqarnermut minitereqarfimmut ingerlateqqissimavaat, taakkua arlaannik unnerluutiginnittoqassanersoq nalilerniassammassuk. Taamatut aalajangernikkut aningaasaqarnikkut ajornartorsiulernermut pisuutinneqartut naalagaaffimmit malersorniarneqalerput. Aningaasaqarnikkummi ajornartorsiorneq amerikamiut 8 miliuunit suliffissaarunnerannik nunarpassuillu aningaasaqarniarnikkut eqqornerlunneqarnerannik kinguneqaraluartoq manna tikillugtu inuit ikittuinnaat unnerluussaasimapput.