Aningaasaqarnikkut ingerlatsineq oqallisigineqarluarpoq
Aningaasaqarnikkut ingerlatsineq pillugu naalakkersuisut nalunaarutaat inatsisartuni ilaasortanit annertunerusumik akerliuffigineqanngikkaluartoq, akunnerpaalunni oqallisigineqarpoq.
Oqallikkusussuseq annertugaluaqisoq aningaasaqarnikkut ingerlatsinermi nalunaarutip ullumi inatsisartuni oqallisigineqarnerani partiit oqaaseqartartuisa annerusumik ajoriffissaqartinnagu oqaaseqarfigivaat.
Erseqqissaatigineqasaarli inatsisartuni oqallinneq sivitsoraluttuinnartoq suli naammassinngitsoq nutaarsiassaqarfimmit qimaannartariaqaratsigu.
Aningaasaqarnermut naalakkersuisup Josef Motzfeldt-ip partiit inatsisartuni oqaaseqartitaasa nalunaarummik tigusilluarnerat, nuannaarutigalugu oqaatigaa.
Taamaattoq aalisarnermut inatsisip nutarterneqarnissaata ukiamut inatsisartut ataatsimiinnissaannut kinguartinneqarnera, partiit ilaasortaatitaasa ataasiakkaat oqaaseqaqattaarfigaat, naak taassuminnga oqallinnissaq aalajangiinissarlu inatsisartuni ukiamut aatsaat pisussaagaluartoq.
Aningaasaqarnermulli naalakkersuisup Josef Motzfeldt-ip maluginiarpaa aalisarnerup iluani pissutsit oqallisigineqarusuttut, oqarlunilu aamma tamanna pisussissamisooortoq; tassami naalakkersuisut oqallissaarutitut saqqummiussaat inatsisartuni ilaasortat akorluarmassuk.
Naatsumik oqaatigalugu aalisarneq pillugu inatsisip allanngortinneqarnissaa assortuussutigineqassasoq ilimagisariaqarpoq, avataasiortut sinerissamilu qanittumi aalisarfiusut killeqarfeerullugit ammaaffigineqarnissaat tamanit isumaqatigineqanngitsoq, malunnarpoq.
Aningaasaqarnikkut ingerlatsinermi nalunaarutip ilaatigut imarivaa inuutissarsiutit namminersorfiusut siunissami amerlineqarnissaat siunniunneqarpoq – ilinniaqqinnissamut periarfissat amerlisarneqartariaqarput, utoqqaat pitsaanerusumik atugaqartinneqartariaqarput – aatsitassanik uuliamillu isertitassaajumaartut aningaasaateqarfimmut pilersinneqartussamut erniortinneqarnissaat takorloorneqarpoq , inissianik atuarfinnillu nutarterinissat siunniunneqartunut ilaapputtaaq.
Nunatta aningaasaqarnikkut aaqissuussiffigineqarnera aningaasassiornerup imminut napatinnerunissaa siunertaralugu ikaarsaariarnissaq taamaalilluni aallartisarneqartussanngorpoq.
