Aningaasaqarnikkut ingerlanerliulerneq Nuummi malunniussimasoq
Grønlandsbanki siunissamut neriulluaraluartoq, nunatta aningaasaqarnikkut ineriartornera isigissagaanni, banki siunissami qaninnermi unammilligassaqarpoq.
- Aningaasatigut ineriartornerit ilaat pissaganartutut oqaatigineqarsinnaanngillat. Soorlu inuiaqatigiit aningaasaqarnerata ajorseriarsimanera eqqarsaatigalugu.
- Tamassumalu ilorraap tungaanut saatinneqarnissaa neriuutigiinnassavarput. Grønlandsbankip pisortaa, Martin Kviesgaard, radioavisimut taama oqarpoq.
Taassuma oqaatigaa, aningaasaqarnikkut ingerlanerliulerneq Nuummi immikkut malunniussimasoq. Tamannalu Grønlandsbankimut sunniuteqarsimasoq. Taamaakkaluartoq sinerissami ineriartorneq bankip iluanaarutigisimagaa.
Nuummi sanaartorneq appariarsimavoq
- Nuummi sanaartorneq ukiuni kingullerni appariarsimavoq tamannalu suliffeqarfinnut soorunami ajortumik kinguneqarsimalluni.
- 2015-ip ingerlanerani sanaartorneq pitsanngoriartussatut isikkoqaraluarpoq, ukiunili kingullerni suliassaasuaqinerup pilersitaanik suliffissaaleqisut amerleriarsimapput, tamannalu inuit pisisinnaanerisa ajorseriarneranik kinguneqarpoq Nuummi pisiniarfinnut tuniluuttumik.
- Illoqarfinnili allani ilorraap tungaanut pisoqarpoq, tamaani aningaasarsiorneq pitsaanerulersimalluni.
AAMMA ATUARUK Grønlandsbanken sinneqartoorluaraluarluni taamaattoq politikerit mianersoqquai
Bankip pisortaata aatsitassarsiorneq piffissami qanittuni ingerlallualernissaa, taamatuttaaq aningaasanik isaatitsilernissaa qularaa. Taamaattumillu nunatta aningaasaqarnikkut ineriartornissaa qulakkeerumallugu politikerit suleqatigiinnerunissai kissaatigalugu.
- Inuiaqatigiit aningaasarsiorfissaat oqartussanit kisimi aningaasalersorneqarluni ingerlanneqassappat taava allanut akissaaruttoqartussaavoq.
- Aatsitassarsiorneq maanna uninngasutut oqaatigineqarsinnaavoq naak suliffeqarfiit ataasiakkat maanna allartisaleraluartut.
- Neriuutigiinnassavarput aatsitassarsiorneq piffissami qanittumi aallartinneqarumaartoq, taamaalilluta ingerlaavarnerusumik aningaasarsiorsinnaalissagatta. Martin Kviesgaard taama oqarpoq.
