Aningaasaqarnikkut ajornartorsiorneq mumippoq
Nunarsuatsinni aningaasatigut ukioq-manna suli ajornartorsiortoqarallassaaq IMF-ip siulittuutigaa, ilimagisamilli annikinnerusumik. 1,4 procentiunissaa ilimagineqaraluartoq 1,1 procentiinnaassaaq.
Nunarsuaq tamakkerlugu aningaasaqarneq 3,1 procentimik annertusissaaq, siusinnerusukkut 2,5 procentiusimalluni.
IMF-ip ilimagaa 2011-miit 2014-ip tungaanut nunarsuaq tamakkerlugu aningaasaqarneq ukiumut 4 procentimik qaffariartassasoq. Aningaasatigut ajornartorsiornerup ukiup ataatsip missaata matuma siorna aallartinnginnerani 5 procentip missaaniinneranut tamanna assersuunneqassaaq. Nutaarsiassaqartitsivimmi Ritzauimi tamanna allaaserineqarpoq.