Aningaasaqarniarnerup oqallisiginissaa partiinit pingaartinneqarpoq

Suliffissaqarnissaq suliffinnillu pilersitsisinnaasut pingaaruteqartut, Siumup politikkikkut oqaaseqartartuata, Karl Lyberthip oqaatigaa.

- Nunatta ineriartoqqinnissaa eqqarsaatigalugu aningaasatigut isertitsissutaasinnaasut suliffinnillu nutaanik pilersitsisinnaanermut sinaakkusersuinissaq Siumuminngaanniit isigaagut.Assersuutitut taaneqarsinnavoq, aatsitassanik qalluinermi saniatigut uranitalinnik qalluinermi uranip akutut qunmmut killilerneqarnissaa. Aammalu aluminiummimik aatsitsiviliorniarnermut tunngatillugu oqallinnissaq pissagassutigaarput, taama oqarpoq Karl Lyberth.

Demokraatit politikkikkut oqaaseqartartuata, Niels Thomsenip pingaartutut oqaatigaa aalisarneq pillugu inatsit oqluuserineqartussaq qilanaaralugu.

- Akileraartarneq Atugarissaarnerlu pillugit ataatsimiititaliarsuup innersuussutaa aammalu Angallanneq pillugu ataatsimiititaliarsuup nalunaarutaa maanna saqqummillattaalereersut oqallisigineqarnissaat qilanaaraarput. Aalisarneq pillugu inatsisip nutaap, ukiorpaalunnilu samminiarneqartarsimasup oqallisiginissaa aamma qilanaaraaput, Niels Thomsen oqarpoq.

Atassummit, Siverth K. Heilmann oqarpoq soorunami oqalliseqataanissartik qilanaaralugu.

- Suleriaasissaq nutaaq ukiarmi Inatsisartuni akuerineqartoq aallaavigalugu, iunersuuteqaqqusineq aammalu allaffissornermi aningaasartuutissanik ilanngussisarnissaq siunniunneqartoq eqqarsaatigalugu, pissanngatigaarput qanoq akissuteqartoqartarnissaa aammalu taassuma oqallisigisarnissaanut qilanaarpugut, Siverth K. Heilmann oqarpoq.

Suliariumannittussarsiortarnerup inatsisiliuunneqarnissaanut oqallinnissaq, Kattusseqatigiit partiiannit pingaartinneqarpoq. Aammalu akileraartarnermut inatsisip oqallisigineqarnissaa pingaartillugu.

Inuit Ataqatigiit politikkikkut oqaaseqartartuat oqaaseqartinniaraluaratsigu iluatsinngilarput.

Inatsisartut upernaakkut ataatsimiinnissaanni aqagu aallartitussami, oqaluuserisassat 70-it oqaluuserineqartussaapput.