Aningaasaqarnermut Siunnersuisoqatigiit: Nalimmassaaneq mianernarpoq
Torben M. Andersenip immikkut eqqaavaa nunap ilaanit ineriartorfiusunit aningaasat millionilikkaat allamut nuukkaanni akisusinnaasoq.
- Aningaasaqarnermut siunnersuisoqatigiit suliassaat tassaavoq, nunatta aningaasaqarnikkut ineriartornera, siunissaq qaninnerusoq ungasinnerusorlu eqqarsaatigalugu, malinnaanissaq, Torben M. Andersen nassuiaavoq, nangillunilu:
- Namminersorlutik Oqartussat Kommunillu ataatsimut isigalugit aningaasaqarneq killeqartupilussuuvoq, Torben M. Andersen KNRimut oqarpoq.
Nunap ineriartornera eqqugaasinnaasoq
Nunatsinni inuiaqatigiit pitsaanngitsumik ineriartornerat aammalu nunatta iluani sumiiffinnut allanut nuuttarnerit annertungaarmata, pissutsit taakku politikkerit tulluussarfigisariaqaraat Torben M. Andersen isumaqarpoq.
Aamma oqaatigaa Qaasuitsup Kommunia, Qeqqata Kommunia kiisilu Kommune Kujalliup nalimmassaanermut periasissaq toqqarsimasaat nunatta aningaasaqarnerata pitsaasumik ineriartornissaralua inarlersigaa.
- Nalimmassaaqqinnerup ajoqutigisinnaavaa, kommunini ineriartorfiusunit aningaasat nuunneqarpata ineriartorneq unikaallatsinneqarsinnaanera. Kommunini ineriartorfiusuni unikaallattoqarnera kingunerisinnaavaa nuna tamakkerlugu aningaasarsiornikkut siuariartornissaq aamma unikaallatsinneqarnera.
Tamaakkaluartorli pingaarnersiuineq oqimaatsoq suliassaasoq oqaatigaa
- Massakkut pissutsit takutippaat ilungersunartunik pingaarnersiuineq pissasoq, Aningaasaqarnermut Siunnersuisoqatigiit siulittaasuat Torben M. Andersen oqarpoq.
Aningaasaqarnermut siunnersoqatigiit nalimmassaanermut aaqqissuusseqqinneq oqarasuaatikkut ataatsimiinnermi ippassaq eqqartortussaagaluarpaat. Teknikkikkulli ajornartoornerit pissutaallutik qulequtaq pineqartoq tikissimanagu.
