Aalisakkat akiisa apparnerat Naalakkersuisut pisuussutiginngikkaat, nunarsuarmili aningaasarsiornerup eqqornerlunneqarneranik peqquteqartoq, siulittaasoq oqarpoq.Assi: Royal Greenland

Aningaasaqarnermut siunnersuisoqatigiit: Aalisartut ikiorsertariaqanngillat

Naalakkersuisut aalisartunut ikiorsiissutinik naammassiniaallutik ulappupput, taakkuli tulluartuunngitsut, Aningaasaqarnermut siunnersuisoqatigiit naliliipput.

Nutartigaq pingasunngornermi nal. 12:20 inuussutissarsiornermut naalakkersuisup Jens Frederik Nielsenip apersorneqarnissani sisamanngornermi pisussaq isumaqatigiissutaareersoq taamaatiinnarpaa. Apeqqutit sooq akerusunnginnerlugit oqaatigerusunngilaa.

Naalakkersuisut aalisartunut ikiorsiissusiinissaq piviusunngortinniarlugu sulissutigisaat inaarsarlugulu ulapputigileruttugaat Aningaasaqarnermut siunnersuisoqatigiit nunatta aningaasaqarnera pillugu ataasinngormat saqqummiinerminni isumassarsiatsialaanngitsutut nalilerpaat.

- Periutsimik nutaamik pilersitsinerussaaq. Aalisartut ingerlalluanngippata nunap karsia annaasanut matussusiissaaq, tamannalu nunap karsianut navianartorsiortitsingaatsiarsinnaavoq, Aningaasaqarnermut siunnersuisoqatigiit siulittaasuat, Torben M. Andersen KNR-imut oqarpoq.

AAMMA ATUARUK Naalakkersuisut aalisartunut ikiorsiissutissanik atuutilersitsilersut

 

Naalakkersuisut nunatsinnut angallanneq matummassuk inuussutissarsiortut takornarialerisullu aningaasatigut ikiorneqarnerat pissusissamisoortuusoq siunnersuisoqatigiit naliliipput. Naalakkersuisulli nunatta karsianit aningaasat atorlugit aalisartunik ikiorsiissuteqarniarnerat allarluinnaasoq siunnersuisoqatigiit naliliipput.

Aalisakkat akiisa apparnerat Naalakkersuisut pisuussutiginngikkaat, nunarsuarmili aningaasarsiornerup eqqornerlunneqarneranik peqquteqartoq, siulittaasoq oqarpoq.

- Aningaasarsiorluarneq aningaasarsiorluannginnerlu siusinnerusukkut nalaattareerpagut, taakkunani aamma aalisakkat akii appartarput. Aalisartunullu ikiorsiissuteqartoqarnikuunngilaq, Torben M. Andersen oqarpoq.

Akit appangaatsiarnerat nunarsuup annersaani Covid-19-ip tuniluunneranut toqqaannartumik atassuteqarput, tamannami neriniartarfinnut neriartortarnitta ikilingaatsiarneranik kinguneqarpoq.

 

Raajat saarulliillu akii pingaartumik apparsimasut, naatsorsueqqissaartarfimmit 2020-mi januaarimiit juulimut aalisakkat avammut tunisaanerannik nalunaarusiami allassimavoq.

 

Kiilumut akii ima appartigaat

 

Aalisakkat pingaarnerit kiilumut akii ukioq manna qaammatit siulliit arfinillit ingerlaneranni siorna piffissamut tassunga sanilliullugit appariarput.
 

  • Raajat kiilumut akii 11,3 procentimik apparput.
  • Saarulliit kiilumut akii 10,1 procentimik apparput.
  • Qalerallit kiilumut akii 6,1 procentimik apparput.

 

Avammut tunisat nalingi ukioq manna januaarimiit juulimut siorna piffissamut tassunga sanilliullugit 129 millionit koruuninik apparsimasut, Nunatta naatsorsueqqissaartarfianit kisitsisit nutaat takutippaat. Tamanna 4,7 procentimik appariarnerup assigaa.

 

Tusarfik: Naatsorsueqqissaartarfik

Taarsigassarsineq

Naalakkersuisut aalisartunut aningaasanik tunniussiinnaratik aningaasanik taarsigassarsititsinissaq isumaliutigisariaqaraluaraat, Aningaasaqarnermut siunnersuisoqatigiit isumaqarput.

- Aningaasanik ikiorserneqarnissamik pisariaqartitsisut taarsigassarsitinneqarpata ajunnginneruvoq. Imaanngitsoq ajornartorsiornermi ikiorneqassasut ingerlalluarfimmilu iluanaarutit tamaasa tigummiinnarlugit, Torben M. Andersen oqarpoq.

Inuussutissarsiornermut naalakkersuisup sisamanngornermi apersorneqarnissaa isumaqatigiissutaareeraluartoq, naalakkersuisoq apersorneqarusunngitsoq allattaa pingasunngornermi nalunaarpoq.

Jens Frederik Nielsenip sooq apersorneqarusukkunnaarnini oqaatigiumanngilaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat