Aningaasaqarnermut Siunnersuisooqatigiit: Pissutsit ilungersunavissorput

Nunatta karsiata amigartoorutaasa matussuserneqarnissaat siunertaralugu Naalakkersuisut qanoq iliuuseqarnissaannik, Aningaasaqarnermut Siunnersuisooqatigiit siulittaasuata, Torben M. Andersenip kaammattorpai. Sermitsiaq taama allappoq.
Torben M. Andersen Assi © : KNR
januaarip 19-at 2015 06:48

- Kalaallit Nunaat piffissami allangorfiusumi maanna inissisimavoq. Namminersornerup 2009-mi eqqunneqarnerata kingorna immikkut taasarialinnik nutarterisoqarsimanngilaq. Tamassumalu peqatigisaanik isertitaajumaartussanut tunngatillugu isumalluavissortoqarsimagaluarluni, Sermitsiamut Torben M. Andersen oqarpoq erseqqissaatigalugulu pissutsit ilugersunarsivissimanerat Nunatsinni maanna ersarissivissimasoq.

AAMMA ATUARUK Aningaasaqarnermut Siunnersuisoqatigiit: Aaqqissuusseqqinnissat pisunit kinguarsarneqarput

Naalakkersuisooqatigiilersullu nutarterinissamut piumassuseqarlutik takutitsinissaat, Torben M. Andersenip maanna pisariaqartutut oqaatigaa.

- Aalajangigassat nuanniitsut aalajangerneqarnissaasa kinguartittarnerat siusinnerusukkut ileqquusimavoq. Kalaallit Nunaatalu karsiata amigartooruteqartarnera taama eqqarsartaaseqarenrup maanna nassataraa, Aningaasaqarnermut Siunnersuisooqatigiit siulittaasua, Torben M. Andersen Sermitsiamut oqarpoq tamassumalu qaangerneqarnissaa inassutigalugu.

Nunatta karsia 2014-ip naanerani 250 millioner koruuninik amigartooruteqarpoq.