Aningaasaqarnermut naalakkersuisunngortup, Inuit Ataqatigiinnit, Asii Chemnitz Narupip nunatsinni aningaasaqarneq piffissami matumani oqinnerpaanngitsoq nassuerutigaa.

Aningaasaqarnermut naalakkersuisunngorlaaq: Milliardinik akiliutaasinnaasoqarpoq

Pisortat amigartoorutaat amerlassapput, aningaasanillu uninngasoqarpoq. Akiligassanulli takkuttunut - aamma coronap ilungersunartorsiortitsineranut atatillugu akiligassanut akiutaasinnaasunik milliardinik uninngasoqartoq, Asii Chemnitz Narupip paasissutissiissutigaa.

Pisortat siorna aningaasaaatasa nutaanik akiligassaqalernikkut allanngorarsimanerat Inatsisartut ullumi oqaluuserisavaat.

Allannguutit ilassutisatut aningaasaliissutinut inatsisissatut siunnersuummiipput, allannguutillu ullumi saqqummiunneqartut akuerineqartussallu corona pissutigalugu immikkuullaripput.

Siornamut aningaaasanut inatsisissaq ukiup siuliani akuersissutigineqarmat, 50 millionit koruunit pallillugit sinneqartoorfiussasoq ilimagineqarpoq.

AAMMA ATUARUK Inatsisartut 2020-imi aningaasanut inatsit akuersissutigaat

Kisianni coronaqalermat inuiaqatigiillu matuneqarmata siorna ukioq ilisimaneqartutut akunnattoorfiulerpoq, politikerillu aningaasaqarnikkut akunnattoorujussuarnissaq pinngitsoortikkumallugu aningaasarpassuarnik immikkortitsipput, nunatta karsiata taamalilluni 450 millionit koruuninik amigartoornissaa missingiunneqarlerluni.

- Sinneqartooruteqarneq oqinnerussagaluarpoq

Aningaasaqarnermullumi naalakkersuisunngortup Asii Chemnitz Narupip maanna pissutsit oqinnerpaatut taaneqarsinnaanngutsutut nalilerpaai.

Taanna KNR-imit apersorneqarnissamut piffissaqanngilaq, KNR-imulli ima allappoq:

- Soorunami ilassutisatut aningaasaliissutinut inatsisissatut siunnersuut, sinneqartoorfioqisoq oqimaaqatigiissorluunnit akisussaaffigilissallugu oqinnerussagaluarpoq.

AAMMA ATUARUK Siornamut missingersuutinik allanngortitsineq nunatta karsianut amigartoorfiugallartoq

Kisianni piffissami qaninnermi akiligassanut aningaasassaqartoq erseqqissarpaa. Taassuma tigoriaannarnik apiffissami qaninnermi akiligassanut 1 milliard koruuninik nunatta karsiani uninngasoqartoq oqarpoq.

Kisianni Nunatta karsiata piffissamut ungasinnerusumut attanneqarsinnanera eqqarsaatigalugu unammillagassartaqaqaaq. Naalakkersuisoqatigiilersut anguniagassagissaaqaat - ingammik isumaginninnerup iluani. Taamaammat taakkua tamaasa ataatsikkut iluarsiniarnissat oqittuinnaanngilaq, aningasaqarnermut naalakkersuisoq, Asii Chemnitz Narup, allappoq.

Amigartoorutit annikinnerusinnaasut

Amigartoorutaasussatulli missingiutit 450 millionit koruunit naliliineruinnarput, assersuutigalugulu coronaqarnerani ikiorsiissutit tamakkerlugit atorneqanngillat.

- Nunatta Karsiata imaanut naatsorsuutit naggataatigut pitsaanerussasut naatsorsuutigaara. Kukkunersiuisup natsorsuutit suli kukkunersiormagit, qanorpiaq pitsaanerussanersut suli oqaatigisinnaanngilara, kisianni amigartooruteqarnissaq naarsorsuutigisariaqarpoq, aningaasaqarnermut naalakkersuisoq allappoq.

Inatsisartut ilassutisatut aningaasaliissutinut inatsisissatut siunnersuut ullumi siullermeerlugu suliaraat, tallimanngorpalli aatsaat nammassissallugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat