- Killifik, ullumikkut atugarput immikkuullarilluinnarpoq, Vittus Qujaukitsoq oqarpoq. Assi: Naalakkersuisut

Aningaasaqarnermut naalakkersuisoq: nammaqatigiitta

Namminersorlutik Oqartussanik nukiit coronavirusimik akiuinermut atussapput. Anigaaserivimmili attartugassarsinissaq pisariaqalissaaq.

Coronavirusimik akiuineq aningaasartuutaavoq. Aningaasarpasuit atussapput. Suliffeqarfinni ammali pisortani.

Namminersorlutik Oqartussat suliffeqarfinnut, coronavirusip akunnattoortitsineranit eqqugaasunut, sulisartunullu, suliffeeruttunut aningasarsiaaruttunulluunniit, isumannaallisaavoq. Taamaaliornerlu nunatta karsiataa uninngasuutaaanut malunniutissasoq, aningaasaqarnermut naalakkersuisoq Vittus Qujaukitsoq, oqarpoq.

- Killifik, ullumikkut atugarput immikkuullarilluinnarpoq. Tamannalu inuiaqatigiinni suliassat assigiinngitsorpassuit kinguartinnerannik tamavimmik kinguneqarput. Aamma pingaarnersiuinissarput massakkut Naalakkersuisuniit imatut nalilerparput, nappaassuup coronap akiornissanut nukissanik pingaarnerpaatut massakkut  atuiffiusssasoq. 

AAMMA ATUARUK Ikiuinissamut milllionilikkaat suminngaanniissanersut nalunartoq

Taamaammat inuuttaasut naammaqataanissaannik kaammattorpai. Tassami politikerit aningaasartuutikilliosarniaaniarlutik iluarsaaqqittussanngussasut, taanna oqarpoq.

- Killiffitta malitsigisaanik inuiaqatigiit paasinninnissaat nammaqataanissaallu pisariaqarpoq, Vittus Qujaukitsoq oqarpoq. 

Aamma politikereqatini aningasartuutitaqartunik siunnersuusiornissamut trunuarsimaarnissaannik qinnuigai.

 

Inuussutissarsiornermut ikiorsiissutit
Ikiorsiissutit nunatsinni suliffeqarfiit coronavirusimik ajornartoornermi aniguinissaannut iluaqutaassapput. Aningaasat taakkua soraarsitsinissaraluanik pinngitsoortitsissutaaassallutillu aningaasarsiatigut annaasanut taartisiassanut atorneqassapput.

50 millionit koruunit namminersorlutik inuussutissarsiortunut aammalu kiffartuussinermik, neriniartarfiuteqarnermik takornariaqarnermillu inuussutissarsiutilinnut ikiorsiissutiginasuaatigineqassapput.

100 millionit koruunit ilaatigut aalisarnermik, angallassinermik sanaartornermillu inuussutissarsiutilinnut atorneqassapput.

107 millionit koruunit sulisut angerlartitat soraarsitaaqqunagit taakkua aningaasarsiassaannut atorneqassapput.

Suliffeqarfiit akileraarutinut akitsuutinullu akiliinissaannik kinguartitsineq. Tamanna nunatta karsianut qaammammut 250 millionit koruuninik akeqartassaaq.

Inuussutissarsiornermut Nalakkersuisoqarfik tapiissasoq 

Ikiorsiissutissat maannakkorpiaq milliardit affaanik naleqarput.

Inatsisartut Aningaasaqarnermut Akileraartarnermullu Ataatsimiititaliaata siulitatasua, Hermann Berthelsen (S), sisamangormat oqaluttarpoq, nunatta karsia 1,6 milliarder koruuninik uninngasuuteqartoq, tassanngaanniit aningaasat atorneqassasut.

Vittus Qujaukitsulli erseqqissaatigaa, ”aningaasat taakku soorunami sunulluunnit atorneqarsinaanngitsut",  soorlu oqartoq.

- Aningaasat ilaat Sanaartornermut Iluarsartuussinermullu Aningaasaateqarfimmik taaneqartartumi sanaartugassanut aningaasaliissutifut pituttugaapput, taanna oqarpoq.

Sanaartornermut Iluarsartuussinermullu Aningaasaateqarfik Karl Frederik Danielsenip Ineqarnermut Attaveqaqatigiinnermullu Naalakkersuisoqarfianiippoq.

Aammali Inuussutissarsiornermut naallakkersuisoqarfik aningaasaliissasoq, Vittus Qujaukitsoq oqarpoq.

Ikorsiissutissani immikkoortut pingasut katillugit maanna 250 millionit koruuninik aningasartaqarput.

- taakkua aningaasalersorneqarput Inuussutissarsironermut Nalakkersuisoqarfiup suliniutini nammineq sinaakkutaani immikkoortinneqarlutik. Immikkut aninmgaasaliissutinik toqqammaveqanngillat suliassalli kinguartikallarnerannik aningaasalersugaallutik.

 

AAMMA ATUARUK Sulisut ikiorsiissutinik annaanneqartut

Taava aamma suliffeqarfiit akileraarutinut akitsuutinullu akiliinissartik kinguartissinnaavaat. Nalakkersuisut ajornartoornerup nalaani qaammatit tamaasa 250 millionit koruunit atussagavaat. Naalakkersuisulli aningaasanik nakkutiginnittua nunatta karsiata ungasinnerusoq isigalugu aningaasartuutaassanngitsoq naliliivoq.  

- Akileraarutinik akitsiitinillu ikiorsiissuteqarnerput aningaasanik naleqanngilaq, kisiannili aningaasanik tigoriaannarnik nunatta karsianut isaatitsinerani taakkua kingusinnerusukkut isertinneqarnissaannik kinguneqassalluni, taanna oqarpoq.

Aningaaaserivinnulli saaffiginninissaq pisariaqalissaaq.

- Qularnaatsoq uaniippoq, corona nappaasuarmik ajornartoornerup kingunerisaanik taarsigassarsiniarnissaq pisariaqalertussaavoq, Vittus Qujaukitsoq oqarpoq.

 

Erseqqissagaq apriilip pingajuani nal. 16.30

Allaaserisami siusinnerusukkut allassimavoq, Sanaartornermut Iluarsartuussinermullu Aningaasaateqarfik Karl Frederik Danielsenip Ineqarnermut Attaveqaqatigiinnermullu Naalakkersuisoqarfianiittoq. Tamatut allassimanera ila erseqqisarparput; Sanaartugassanut Iluarsagassanullu Aningaasaateqarfik pingaarnertut Missingersuutinut Inatsimmi maleruagassiuunneqarpoq.

Isummersuutit