'Aningaasaqarnermut iluaqutaasinnaanera kisiat isiginiarparput'

Assartuussineq pillugu isumalioqatigiissitap suliaqarnerminni isiginiarsimasaata ataasiinnaasimanera, isumalioqatigiissitap siulittaasuata, Christen Sørensenip erseqqissaatigaa: Kalaallit Nunaat angallanerup tungaatigut qanoq ililluni imminut akilersinnaasumik ingerlatsisinnaanersoq. Isiginiagassat allat politikerinit naliligassaanerarpai.
apriilip 01-at 2011 16:22

Naluneqanngitsutut Kalaallit Nunaanni angalaneq assartuussinerlu, nunap innuttaasukinnera isorartuneralu pissutigalugit akisuujuvoq. Tamannalu allanngornavianngilaq; assartuussineq pillugu isumalioqatigiissitaqaraluarpalluunniit naamik. Siunnerfillu allaavoq:

-Nalunaarusialiarput qiviaraanni, Kalaallit Nunaanni akikitsumik angallattalertoqarsinnaannginnera maluginiassallugu pingaaruteqarpoq.
Kisianni soorunalimi sapinngisamik angusaqarfiunissaa atuisunullu ajornannginnerunissaa anguniarneqarsinnaavoq. Tassanilu uagut suliassarisimavarput,  aningaasat sapinngisamik  qanoq atorluarneqarnissaat misissussallugu.

Christen Sørensen oqarpoq, suliassallu arlallit aallarnerneqalereersinnaasorai:

- Nalunanngitsumik Nuummi nutaamik umiarsualivimmik pilersaarutit aallarnisarneqaqqaagassatut piukkunnartut ilagaat aammalu kujataani angallannerup aaqqiivigineqarnissaa. Tamakkulu saniatigut nuna tamakkerlugu allanik aaqqiivigisassaqarpoq, erseqqissaatigisattalu ilagaat, Artic Umiaq Line matuneqartuuppat aningaasarpassuarnik sipaaruteqarsinnaalernissaq. Qaanaami timmisartoqarfik piaartumik matuneqartuuppat, amerikarmiullu isumaqatigiissuteqarfigalugit, aningaasarpassuarnik sipaartoqarsinnaavoq.
Taamaammat aallarnisarneqaqqaagassatut piukkunnartut arlaqarput.

Qanorluunniillu aalajangiisoqaraluarpat, inassuteqaatit ataasiakkaat nuna tamakkerlugu misigissutsinik aalassatsitsinissaat, politikkimilu oqallinnerujussuarmik pilersitsinissaat qularnanngilaq.

Christen Sørensinillu erseqqissarpaa, politikkikkut aalajangiinikkut suut piviusunngortinneqarsinnaanissaat isumalioqatigiissitamit eqqarsaatiginiarneqarsimanngitsoq, taamaallaalli inuiaqatigiit aningaasaqarniarnerannut iluaqutaasinnaasut isiginiarneqarsimasut:

- Inassuteqaatini sorleq piviusunngortikkuminarnerpaanersoq politikerinit aalajangigassaavoq. Assersuutigalugu Narsarsuarmik Kangerlussuarmilluunniit matusinissamik aalajangiinissaq politikkip tungaatigut ajornaatsuinnaanavianngitsoq tupinnanngilaq
Tamanna uagut aalajangersinnaanngilarput, taamaallaalli suna imminut akilersinnaanersoq misissorsimavarput. Assartuussineq pillugu isumalioqatigiissitami siulittaasoq Christen Sørensen taama oqarpoq.