Aningaasaqarnermut ataatsimiititaliaq Naalakkersuisunik sakkortuumik uparuaavoq
- Naalakkersuisoqarfiit akornanni ataqatigiissaarinerup akuerineqarsinnaanngilluinnartumik amigaateqarneranik aningaasanut inatsisissamik ukioq manna suliarinninneq sunnerneqarsimasimavoq.
Aningaasaqarnermut Ataatsimiititaliaq, IA-meersunik Naaja Nathanielsenimik Aqqaluaq B. Egedemillu, Demokraatineersumik Niels Thomsenimik aammalu Siumumeersunik Finn Karlsenimik Per Berthelsenimillu ilaasortaqartoq, aningaaasanut inatsisissatut siunnersuummut atatillugu isumaliutissiissumminni taama allapput. Aningaasanut inatsisissaq aappassaaneerlugu ullumi suliarineqasssaq.
Ataatsimiititaliap akuerisinnaanngilluinnagaatut ataqatigiissaarisoqannginneranut ersiutinut ilaavoq, aningaasaqarnermut naalakkersuisoq Palle Christiansen, ataatsimiititaliap apersuinerani nassuersimammat, Kultureqarnermut, Ilinniartitaanermut, Ilisimatusarnermut Ilageeqarnemullu naalakkersuisoqarfiup akissutaa erseqqissumik kukkusoq nammineq illersorsinnaannginnamiuk. Taamaattorli akissut taanna Palle Christiansenip aningaasaqarnermut ataatsimiititaliamut allakkiaani aamma ilaalluni.
Taamaammat aningaasaqarnermut ataatsimiititaliap isumaliutissiissummini ministeritut akisussaanermut inatsit eqqaasitsissutigaa, allalluni naalakkersuisunut ilaasortaq paasissutissanik eqqunngitsunik kukkusunilluunniit inatsisisartunut - aammalumi aningaasaqarnermut ataatsimiititaliamut - ingerlatitsiseqqikkuni politikkikkut akisussaatinneqarsinnaasoq.
Kisianni - aningaasaqarnermut ataatsimiitialiami ilaasortat allapput kissaatiginngikkitsik, naalakkersuisunut ilaasortat arlaalluunniit inatsimmik unioqqutitsisimasutut pasinarsassallugu.
Ingammik Palle Christiansen paasitikkusuinnarpaat, politikikkut inatsisitigulluunniit akisussaanini qimarratigisinnaanngimmagu, innersuussutigalugu, paasissutissat nammineq naalakkersuisoqarfimmi ingerlateqqitai kukkusut, aallaqqaammut tassangaanneersuunngitsut.
Taamaammat ataatsimiititaliaq kaammattuivoq, paasissutissat ingerlateqqitsinnagit misissorluartaqqullugit.
