Aningaasaqarnermut ataatsimiititaliaq naaggaarpoq

Nuummi umiarsualivimmik containerersorfiusumik nutaamik sananiarnermut atatillugu, Naalakkersuisut aningaasartuutaanngitsumik nikisiterinissaat, aningaasaqarnermut ataatsimiititaliap tamarmiusup itigartippaa.

Aningaasaqarnermut ataatsimiititaliaq isumaqarpoq, qinnuteqaat Jens B. Frederiksenip naalakkersuisoqarfianeersoq erseqqarluppallaartoq, tamatumunngalu peqatigitillugu Assartuineq pillugu isumalioqatigiissitap isumaliutissiissutaata ukiamut ataatsimiinnermi isummerfigineqarnissaa utaqqimaaqqaarusunneqarluni.

Naalakkersuisut ilaatigut kissaatigaat, Nuummi umiarsualivimmut containerersorfiusumut aningaasaliissutit 3,4 millionit koruuninik qaffanneqassasut. Aningaasat taakku aningaasaliissutinit allanit nuunneqarnissaat Naalakkersuisut kissaatigaat, ilaatigut mittarfinnut aningaasaliissutinit, Narsarsuarmi talittarfiup nutarterneqarnissaanut aningaasaliissutinit, Ilulissani mittarfimmut sanaartugassanut aningaasaliissutinit, aamma Aasianni imeqarfiup nutarternissaanut aningaasaliissutinit.

Jens B. Frederiksen qinnuteqaammini allakkaluarpoq, aningaasanik aallerfiginiarneqartut tassaasut suliassatut pilersaarutit minnerusut. Tamannali Aningaasaqarnermut ataatsimiititaliamit akueriumaneqanngilaq. Ataatsimiititaliaq isumaqarpoq, suliassat naammassineqarsimasutut oqaatigineqartunit aningaasaliissutinik nuussinerup kingunerisassaasa allaaserineri tamakkiisuunngitsut.

Aningaasaqarnermut Ataatsimiititaliap aamma pingaartutut taavaa, Assartuineq pillugu isumalioqatigiissitap isumaliutissiissutaa Inatsisartuni suli oqaluuserineqanngimmat.

Tassami Assartuinermut isumalioqatigiissitap pingaarsiuineranit allaasumik Inatsisartut pingaarnersiueratarsinnaammata.

Aktiaateqarluni ingerlatseqatigiiffimmik Kommuneqarfik Sermersuumit, Royal Arctic Linemit, Namminersorlutik Oqartussanit Aalborgillu umiarsualivianit pigineqartumik eqqarsaatigineqartoq, isummernissamut tunngavissiami takuneqarsinnaavoq. Aktiaaliteqatigiiffiup teknikkikkut, inatsisitigut aningaasatigullu misissoqqissaagassat isumagissavai, sanaartorneq taamaalilluni 2012-imi aallartinneqarsinnaaniassammat.

Taamaattorli Aningaasaqarnermut ataatsimiititaliap aktiaateqarfiup Nunatta karsianut qanoq kinguneqarnissaa erseqqarlunnerarpaa. Tassami ataatsimiititaliaq isumaqarmat, umiarsualivik containerersorfiusoq aktiaateqarfiup aningaasanik atorniarneratigut aningaasalersorneqassasoq, tamannali Jens B. Frederiksenip qinnuteqaataani ilanngunenqarsimanngitsoq, Aningaasaqarnermut ataatsimiittaliap itigartitsinerminut atatillugu erseqqissarpaa.