Aningaasaqarnermut ataatsimiititaliaq allanngortitsisinnaanngilaq
Ulloqeqqaanerani radioaviseqarnitsinni tusarparput, nunaqarfinni arlalinni tunisassiorfimmi sulisut toqqissisimanngitsut. Arctic Green Foodip sinerissami tunisassiorfiutaanni sulisut, sipaaruteqartoqarnissaa tusarlugu suliffissaarunnissartik ernummatigaat.
Ualiartoq inatsisartut allattoqarfianninngaanniit Arctic Green Foodimut tunngatillugu allagaqartoqarpoq ilaatigut ima imaqartumik.
- Suliffeqarfiup tunisassiorfiinik matusinissaq naatsorsuutigineqartoq pillugu Arctic Green Food (AGF) tusagassiorfinnut ulloq 23. november nalunaaruteqarpoq. Tamannali suliamik eqqoqqissaartumik saqqummiinerunngilaq, Inatsisartut aningaasaqarnermut ataatsimiititaliaa naliliivoq.
- Eqqortoq tassaavoq Naalakkersuisut namminneerlutik Arctic Green Foodip tunisassiorfiini 2009-mit 2012-imut ukiumoortumik sipaaruteqartarnissaq siornali siunnersuutigimmassuk. Siunnersuutaat Aningaasaqarnermut Ataatsimiititaliamit isumaqatigiittumit taperserneqarpoq. Tamatuma saniatigut aningaasaliissutit siunnersuutigineqartutut ikilisinneqarnissaat Naalakkersuisut siunnersuutigisaannit sukkanerusumik pissasoq Aningaasaqarnermut Ataatsimiititaliamit siunnersuutigineqarpoq, ataatsimiititaliaq nassuiaavoq.
Allannguutissatut siunnersuutit taakku Aningaasanut inatsisissatut siunnersuutip pingajussaaneerneqarnerani Inatsisartunit isumaqatigiittunit akuersissutigineqarput.
Tassa tunisassiorfinnik ingerlatsinermut tapiissutit aappaagu 9 millioni koruuninik ikilisillugit 8 millioninngussapput, 2010-mi 3 millioninngussalluni. 2011-imi 1 millioninngussallutik 2012-imilu tapiissuteqartoqartarunnaassalluni.
Inatsisartunit Naalakkersuisunillu tamakkiisumik taanna isumaqatigiiffiusoq, inatsisartut aningaasaqarnermut ataatsimiititaliaa nassuiaavoq.
Taamaattumik aamma suliffeqarfiup Namminersornerullutik Oqartussat eqqartuussivimmut suliassanngortilersaarlugit Arctic Green Foodip oqaatigisaa namminneq akuliuffiginiarnagu oqaatigaat.
Naggataagut eqqaasitsissutigaat Arctic Green Foodimut sullissinissamik isumaqatigiissut maanna atuuttoq 2009-mi januaarip naanerani atorunnaartussaammat.
Inatsisartut aningaasaqarnermut ataatsimiititaliaani siulittaasoq Augusta Salling oqaaseqartinniaraluaratsigu naalakkersuisunut innersuuppaatigut, namminneq ammasumik oqalliseqataaniannginnamik.
Arctic Green Foodimi siulersuisut siulittaasuat Charles Kastberg ualilluinnartoq nalunaarpoq, Aalisarnermut, Piniarnermut Nunalerinermullu naalakkersuisoqarfimmi pisortaq isumaqatigiinniarnissanut atatillugu ataatsimeeqatiserineqarsimallutik.
