Assi: Kalaallit Airports A/S

Aningaasaqarnermut ataatsimiititaliap mittarfiliortiternissamut isumaqatigiissut unitsikkusukkaa

Aningaasaqarnermut akileraartarnermullu ataatsimiititaliap mittarfiliortiternissamut isumaqatigiissutip imarisaa sukumiisumik paasisaqarfiginerorusuppaa, taamaanngippallu isumaqatigiissummit atsiornissaq taamaattiinnarusullugu.

Allaaserisaq nutarterneqarpoq 18:23 isumaqatigiissutip marlunngornermi  atsioqatigiissutigineqarnissaata allamut nuunneqarnera pillugu.

Nuummi Ilulissanilu mittarfiliortiternissamut Kalaallit Airportip Munck Gruppen A/S-illu isumaqatigiissutaat unitsinneqarnissaa aningaasaqarnermut ataatsimiititaliamit piumasarineqarpoq.

Aningaasaqarnermut akileraartarnermullu ataatsimiititaliaq tallimanngornermi unnukkut tugasassiuutinut taama allappoq. 

Aningaasaqarnermut akileraartarnermullu ataatsimiititaliami ilaasortanit arfineq marluusunit Siumumeersut pingasuupput.

Tusagassiutinut nalunaarummi allaqqavoq Kalaallit Airportip Munck gruppernilu mittarfiliortiternissamut tunngatillugu isumaqatigiissutaata paasissutissartai naammanngitsut, taamaammat isumaqaatigiissutip unitsinneqarnissaa ataatsimiititaliamit piumasarineqarpoq.

AAMMA ATUARUK Ilulissani Nuummilu mittarfiliornissanut Munck A/S toqqarneqartoq

Pinasuartumik aggersaanermi aningaasaqarnermut akileraartarnermullu ataatsimiititaliamit suliaq oqallisigineqarpoq.

- Siunnersuinissamut ataatsimiititaliap upernaarli paasissutissanik pissarsiniartarsimagaluarpoq, piumasaqaataasali piviusunngortinneqartannginnerata kinguneranik aggeqqusinermik kinguneqartoq, aningaasaqarnermut ataatsimiitialiaq tusagassiuutinut allappoq. 

Kielsen ataatsimiinnermut takkuttoq

Tusagassiuutinut nalunaarummi allaqqavoq naalakkersuisut siulittaasuat aggersaagasuarnermi takkutingitsoq, tamannali ataatsimiititaliami isornartorsiorneqangaatsiarpoq.

- Naalakkersuisut siulittaasuat aggersaanermi takkutinngitsoortarnera arlaleriarluta misilliffigereerparput, tamannalu eqqarsarnartoqartipparput.

- Inuiaqatigiini aningaasaqarneq eqqarsaatigalugu mittarfissuarnik suliniuteqarnerup anigaasalersorneqarnera pillugu Anigaasaqarnermut ataatsimiititaliaq ilisimatinneqartinnagu ataatsimiititaliami amerlanerussuteqartut isumaqatigiissutip atsiorneqannginnissaa piumasaraat. Amerlanerussuteqartut isumaat malillugu isumaqatigiissutip atsiorneqarnissaanut tunngavissat amigarmata, taama tusagassiuutinut allapput.

AAMMA ATUARUK Mittarfissanut suliniutini suliarinnikkusuttut pingasut Kalaallit Airports neqeroorfigaat

- Isumaqatigiissutip atsioqatigiissutigineqannginnerani imarisai aningaasatigullu kingu­nissai pillugit Aningaasaqaqarnermut Akileraartarnermullu Ataatsimiititaliap ilisimatinneqaqqaar­tariaqarluarneranik Naalakkersuisut qanoq naliliinerat ilaatigut siunersioqatigiinnermi ujartorneqarpoq. Siunersoqatigiinerup kingorna ataatsimiititaliami amerlanerussuteqartut isu­maqarput pisariaqartumik paasissutissanik pissarsiniarnertik suli amigartoq.

- Aalajangiinis­samut tunngavissat pitsaanerusumik paasisimaneqarnissaat aamma Aningaasanut Inatsisissamut isumaqatigiinniarnissanut attuumassuteqarluinnartutut ataatsiititaliami amerla­nerussuteqartut isumaqarmata. Mittarfinnik suliniutit inernerisa sapinngisamik pitsaasuu­nissaat ataatsimiititaliami amerlanerussuteqartut qulaani taaneqartutut piumasaqarnerannut tunngaviuvoq.

Demokraatit suli tapersersuisut

Mittarfikiortiternissamut isumaqatigiissut suliDemokraatinit tapersersorneqarpoq, demokraatit ataatsimiititaliami ataatsimik ilaasoraatitaqarput.

- Mittarfissuit sanaartorneqarnissaanut killiffimmik paaseqarusunneq Demokraatit taperser­sorpaat. Tamatumunnga Naalakkersuisoq ima oqaaseqarpoq; Naalakkersuisut naatsorsuuti­ginngilaat mittarfiliortiternermi aningaasanut inatsini allassimasut saniatigut ataatsimiitita­liamillu ilisimaneqareersut saniatigut aningaasartuuteqarnissaq naatsorsuutigineqanngilaq aammalu maannamut pilersaarusiornermi sanaartornissamut missingersuutit qaangerneqar­nissaat ilimananngitsoq kiisalu piffisaliunneqartut pilersaarutit erngumassutigineqarnerinik paasissutissiisoqarsimanngitsoq, tusagassiorfimmut nalunaatummi allaqqavoq.

- Ulloq 22. november 2018 mittarfiliortiternissaq akuersissutigigatsgu ilisimalluinnarparput suna inatsisitigut tunngavissinnerlugu.

Kalaallit Airport tallimanngornermi Sermitsiaq.ag-mut nalunaartuteqarpoq Munck gruppenilu marlunngorpat atsioqatigiinnissamut isumaqatigiissutaat taamaatiinnarneqartoq, atsioqatigiinnissamullu taamaatitsineq sanartornissamut sunniuteqarnavianngitsoq erseqqissaatsigalugu.

Atsioqatigiinnissaq Københavnimi pisussaanngortoq

aviisip Sermitsiaq.Ag-ip nittartagaani allaaserineqartoq naapertorlugu, Kalaallit Airportip suliffeqarfiullu Munck Gruppenip mittarfiit marluk suliarineqarnissaannut isumaqatigiissumik atsioqatigiillutik Nuummi marlunngornermi malunnartitsinissaat Københavnimi pisussanngortoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat