Aningaasaqarnermut siunnersuisooqatigiit siulittaasuat. Assi: Martin Krogh/ KNR

Aningaasaqarnermik ilisimasalik missingiutaagallartut amigartoorfiunerannut eqqissisimasoq

Nunatta aningaasaqarneranut tunngaviusumik missingersuutit ulluni kingullerni oqallisaangaatsiartut pillugit aalajangeriivilluni inerniliisoqarsinnaanngilaq. Aningaasaqarnikkut siunnersuisooqatigiit siulittaasuat aalajangersumik taama oqarpoq.

- Kalaallit aningaasaqarnerani tupannartoq.

Aningaasaqarnermut akileraartarnermullu ataatsimiititaliami ilaasortaq, Inuit Ataqatigiinnilu siulittaasoq, Muté B. Egede Sermitsiamut juunip ulluisa aappaanni taama oqarpoq. Nunattalu tunngaviusumik missingersuutaani 461,5 millionit koruuninik amigartooruteqarnera aningaasanut inatsisissap isumaqatigiinniutigineqannginnerani politikkikkut oqallisigineqangaatsialerpoq.

Tunngaviusumik missingersuutit kisitsisaapput aningaasanut inatsisip suliarineqarnerani siusissumi piareersimasut taakkulu kisiisa tunngavigalugit inerniliinissaq mianersuuttariaqartoq, aningaasaqarneq pillugu siunnersuisoqatigiit siulittaasuat, Danmarkimilu aningaasaqarneq pillugu siunnersuisooqatigiit siulittaasorisimasaat, Torben M. Andersen nassuiaavoq.

- Taanna missingiipajaaginnarneruvoq, tamaammat isumalersugassaanani. Pingaarnersiuinerit ajornakusoornerannik politikkikkullu erseqqissagassaqarneranik soorunami oqariartuuteqarpoq, aningaasanulli inatsisissatut siunnersuut suli takunngilarput, taamaammat mianernartoqarneranik oqaatiginninnissaq suli siusippallaarpoq, Torben M. Andersen oqarpoq.

Tunngaviusumimmi missingersuutini pissutsit asigiinngitsut naatsorsuinermilu atugassat aalajangiisuusussat suli ilaanngillat.

Assersuutigalugu naalagaaffiup tapiissutaani akinik akissarsianillu naatsorsuinerit kisinneqartunut suli ilaanngillat. Taakku kisimiillutik missingersuutinut 275 millionit 278 millionillu koruunit akornannik pitsanngorsaataassapput.

 

Ernumasoqartariaqanngilaq

Taamaammat Nunatta aningaasaqarnerata amigartooruteqarfiunera innuttaasutut nalinginnaasutut ernumassutigineqartariaqanngitsoq, Torben M. Andersen isumaqarpoq.

Naalakkersuisut aningaasanut inatsimmik oqimaaqatigiittumik sinneqartooruteqarfiusumilluunniit suliaqarnissaat missingersuutinut inatsimmi aalajangersagaasoq, taassuma erseqqissaatigaa.

Tamannali aningaasanut inatsisissap suliarineqarnissaani arlalitsigut sukateringaatsiarnissamik aamma isumaqarpoq.

- Tunngaviusumik missingersuutit amigartooruteqarfiugunik tamanna aningaasakisaarnermut takussutissiissaaq. Kissaatigineqartut amerlapput isertitallu killeqanngitsuunngillaq. Taamaammat oqimaaqatigiisitsilerniarluni politikkikkut aalajangernissat imaannaanngitsut aqqusaagassaapput, Torben M. Andersen oqarpoq.

Tamanna Aningaasaqarnermut Naalakkersuisup, Vittus Qujaukitsup (NQ) aamma ilalerpaa.

- Tunngaviusumik missingersuutini amigartooruteqarneq tupiguutissaanngilaq. Politikkikkut pingaarnersiugassarpassuaqarneranut takussutissiiginnarpoq. Aningaasanut inatsisissamuunnaanngitsoq nalinginnaasumilli kalaallit inuiaqatigiivisa ilusilersornerani, Vittus Qujaukitsoq KNR-imut oqarpoq.

Vittus Qujaukitsup aalisarneq, ilinniarfinni ingerlaqqiffiusuni ilinniakkamik unitsitsiinnartut, suliniutillu suliffissaaleqinermut apparsaataasussat ilaatigut misissuiffiginiarpai. Suliffeqarnermi ilanngaatit Naalakkersuisut siusinnerusukkut sulissutigisimavaat.

Nammineq illumut missingersuutivit assigaa

Tunngaviusumik missingersuutit oqallisigineqarnerat tigussaasoqanngitsut tunngavigalugit oqallisigineqarnerarpaa. Tamatumunngalu atatillugu tigussaanerusumut kisitsimmut sumut sanilliussinnaanerit, Torben M. Andersenip assersuutissaqartippaa.

- Igaffimmi issiallutit aappaagumut aningaasanik qanoq atuinissat qanorlu isertitaqarnerlutit eqqarsaatigigukku, qanorluunniit peqqissaarutsigigaluarukku amigartooruteqarsinnaallutillu sinneqartooruteqarsinnaavutit. Tamatuma kingorna missingersuutivit qanorpiaq isikkoqarnissaanut aningaasartuutitit isertitatillu misissorluaqqissaassavatit, Torben M. Andersen oqarpoq.

Taamaammat assersuutigalugu missingersuutinut pitsanngorsaataasinnaasunik soorlu missingersuutinit siullernit akileraarutinut akiliutinit utertitsoqanngeriataarsinnaavoq?

- Tassa tamakkuusinnaapput, Aningaasaqarnikkut siunnersuisooqatigiit siulittaasuat oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat