Aningaasaqarneq: Namminersortunngorsaaneq ajornakusoorsinnaavoq
Taamaattumik Namminersortut suliffeqarfiutaat namminersortunngorsarneranut atatillugu tuniniaruminaassaqaat, naak namminersortunngorsaanermik isuma ilalernartinneqaraluartoq. Taama aningaasarsiornermik ilisimasaqartoq Lise Lyck oqarpoq, 60-ikkunnilu nunatsinni namminersortunngorsaagaluarneq iluatsippallaanngitsoq assersuutigalugu.
G-60-i pileruttormat suliffeqarfiit namminersortut danskinit imaluunniit nunanit allaneersunik ingerlanneqartussat kalaallit nunaanni pilersinneqarnissaat pimoorunneqarsimangaluarpoq. Piffissamili tassanerpiaq Danmarkimi Europamilumi aningaasarsiorneq pitsanngoriarujussuarsimavoq, angingaasallu ajornannginnerusumik pissarsiarineqarsinnaalersimallutik, soorunalumi Kalaallit Nunaanni - Danmarkimut, Europamut nunanullu allanut sanilliullugu angingaasanik sinneqartoornissap qularnakujussinnaanera pissutigalugu ornigineqarsimanani.
Ajornartorsiutaasummi ukuupput: Inukinnerujussua inuillu siaruaassimaqalutik najugaqarnerat, kiisalu Kalaallit Nunaata avinngarusimaqaluni inissisimanera.
Kisiannili asserssutigalugu Royal Greenland piukkunnaateqarsinnaavoq, apeqqutaassaarli sunik, qanorlu amerlatigisunik immikkut piumasaqaateqartoqassanersoq, soorlu qanoq amerlatigisunik tunisassiorfeqassanersoq, tassami tunisassiorfiit ikittut sinneqartoorfiusinnaasullu pigineqarpata pisiarissallugu pilerinarnerussaaq, akerlianilli massakkutut tunisassiorfiit amerlappata sinneqartoorfiuallaarnatillu taava soorunami pilerinassusia minnerulissaaq.
