Aningaasaqarneq ingerlalluarpoq
Raajat akii appasikkaluartut uulialu akisugaluartoq, nunatta aningaasaqarnera ilimagisamit ingerlalluarnerusoq, nunatsinni aningaasarsiorneq pillugu statsministerimut siunnersuisartut nalunaarusiaminni ullumi saqqummiunneqartumi naliliipput.
Nunatsinni aningaasaqarnerup pitsaasumik ingerlaneranut pissutaatinneqartut assigiinngitsuupput, ilaatigut inuit ataasiakkaat pisiortornerulersimanerat kiisalu nunami suliassanut tunngatillugu aningaasaliiumassuseq ilimagisamit qaffariangaatsiarsimanera pissutaallutik. Aammali takornariartitsinermi aatsitassanillu ujarlernerit qalluinerillu suliassat amerlinerannut pissutaaqataatinneqarput.
Aningaasarsiornikkulli qaffassaanissamik polikkeqartoqaraluartoq ukiuni tulliuttuni pitsaanerusumik angusaqarluarnissaq naatsorsuutigineqarsinnaanngitsoq siunnersuisartut naliliipput. Tamatumunnga pissutaatinneqarpoq, raajat akiisa qangatut qaffangaatsiarsinnaanissaat ilimagineqanngimmat, taamatuttaaq raajartassat allannguuteqarsimannginnerat, qaleralittassat saattuartassallu ikiliartuinnarnerat pissutaaqataallutik. Tamakku pissutigalugit suliffissaaleqisut ukiormanna amerlerialaarnissaat aamma ilimagineqarpoq. Taamaattumik inuit ataasiakkaat inuussutissarsiutitigut piorsaanissaat pisariaqarluinnartutoq siunnersuisartut isumaqarput, taamaaliornikkut aningaasarsiornermi patajaatsumik akilersinnaanerusumillu ingerlatsilernissamut periarfissat pilersinneqassammata.
Siunnersuisartut siulittaasuat Christen Sørensen ukiunut tulliuttunut tunngatillugu ima siunnersuuteqarpoq:
- Meeqqat atuarfianninngaannit qaffasinnerusunut ilinniartitaanerit qaffassarneqartariaqassapput, ilinniartut ilinniakkaminnik unitsitsiinnartartut amerlaqisut ikilisinneqarsinnaaniassammata. Taamaaliornikkut sulisinnaasut amerlanerulissapput. Christen Sørensen siunnersuivoq.
