Aningaasap immikkut ittup assitaa assurineqarpoq
Aningaaserivissuup aningaasamik immikkut ittumik Issittup Ukiuinut atatillugu saqqummersitsineranut atatillugu tamanna pivoq. Aningaasami 20-dollarimi assiliartaliunneqarsimavoq ilisimasassarsiortartoq Martin Frobisher, taanna 1576-imi Canadaliarpoq, Sullualummik ullumikkut taagorneqartoq ujarlugu. Aningaasami assitaliunneqartumi Frobisherimut aapparitinneqarpoq Inuk qaannamik nammattoq. Assitaliunneqartorlu taanna naggueqatitta suliniaqatigiiffiata uparuarpaa.
Naggueqatigiit Inuit akornanni Martin Frobisher ilisimaneqarpoq 1576-imi naggueqatitsinnik angummik qajalimmik aallarussisimasutut, taanna Tuluit Nunaaliaassimavaa kikkunnut tamanut takusassiariniarlugu.
Angulli taanna Tuluit Nunaannut apuussimatsiaannarluni toqusimavoq. Frobisher aappaaguani Canadaliaqqippoq, tamatumuunalu naggueqativut pingasut Tuluit Nunaannut aallarullugit. Taakkuli aamma Tuluit Nunaannut apuussimatsiaannarlutik tamarmik toqupput.
- Canadamiut aningaasaanni naggueqatigiit Inuit assitaliunneqaraangata nuannaartarpugut, taamaattorli aningaaserivissuaq taamatut assitaliitinnani naggueqatigiit Inuit suliniaqatigiiffiinut saaffiginnissimasariaqaraluarpoq, taama oqarpoq Stephen Hendrie Inuit Tapiriit Kanatamimeersoq. Taanna Canadamiut aningaaserivissuannut nassuiaateqarluni allagaqarsimavoq.
Aningaaserivissuup oqaaseqartitaa, Alex Reeves oqarpoq, aningaasap assitassaa pillugu issittumut ilisimasallit oqaloqatigisimagitik, taamaattorli naggueqatigiit Inuit suliniaqatigiiffii attavigineqarsimanngitsut.
