Aningaasanut tunngasut oqaluuserinerussavaat

Inatsisartut nalunaaqutaq ataatsimut ataatsimiilerpata ulloq ataatsimiiffik tassaassaaq aningaasanik eqqartuiffik.

Akileraarutinut tunngasut qinikkat siullermik oqaluuserissavaat. Taakkununnga ilaavoq akileraarutinut tunngassutillit kommuniniit Namminersornerullutik Oqartussanut nuunneqarnissaannut siunnersuut.

Akileraarutissap angissusiata aalajangerneqartarnera illoqarfinni annerni sisamani pisassaaq.

Meeqqat ileqqaartinneqartalernissaannut Naalakkersuisut siunnersuutaat ullumikkut oqaluuserisassanut aamma ilaavoq.

Siumukkunnit taanna isumassarsiaavoq, naalakkersuisooqatigiillu siorna avissaarnerannut pissutaaqataalluinnarluni.

Meeqqat ileqqaartinneqartalernissaannut siunnersuut Inuit Ataqatigiit taamanikkut tapersersunngilaat. Siunnersuulli naalakkersuisooqatigiit nutaamik isumaqatigiissutaannut maanna ilannguppoq.

Siunnersuut naapertorlugu meeqqat tamarmik ukiumut 1000 koruuninik pissarsisassapput. Taakku kontomut matoqqasumut ikineqartassapput, meeqqallu 18-liigaangamik aatsaat tigusisinnaassapput.

Meeqqat ileqqartinneqartalernissaat, pilersaarutit malillugit, ukiortaamiit aallartinneqassaaq.