Aningaasanut toqqorsivik piareersarluakkamik ujajaaffigineqartoq

Ujajaasut qulimiguulimmut qaqortumut ilaallutik illorsuup qaavanut missimapput. Ujajaasut ikinnerpaamik marluk igalaaq illorsuup qalianiittoq aserorlugu aningaasanik toqqorsivimmut isersimapput, kinguninngualu illorsuarmit arlaleriarluni qaartitsisoqarpallattartoq, Danmarkip Radioanit oqaatigineqarpoq.

Aningaasat tillitat qulimiguulimmut usilersuunneqareermata, qulimiguulik sukkaqaluni atsissukkut timmilluni avannamut aallarsimavoq.

Politiit immikkut sungiusarsimasunik aggersaapput, kisianni taakkua qulimiguuliutaat qangattarsinnaasimanngilaq.

- Qulimiguuliuterput soriarsinnaajunnaarsitaasimavoq. Qaartartumik ikisiffigineqarsimavoq qangattartinneqarsinnaananilu, Ulrika Lönngren Söderortimi politiineersoq, aviisimut Expressenimut oqarpoq.

Tamatuma saniatigut ujajaaffiusup eqqaani aqqusineq kikissanik qummut sammisunik ilioraaffigineqarsimavoq, taamalu politiit apuussinnaajunnaarsillugit.

- Ujajaasut piareersarluaqqissaarsimapput. Ujajaanermik taama ittumik naammattuuisimanngisaannarpunga, Ulrika Lönngren oqarpoq.

Taassuma ujajaanermi aningaasat qanoq amerlatigisut tillinneqarsimanissaat eqqoriarsinnaanngilaa, taamaattorli aningaasanik toqqorsivik pineqarmat, tillinneqartut aningaasarpassuusinnaanerarpai.

Qulimiguulik tatsip eqqaanut qimanneqarsimasoq politiit nassaaraat, ujajaasulli sumut ingerlaqqissimanissaat ilisimaneqanngilaq.