Sulisitsisut Peqatigiiffiat: Aningaasanut inatsit tunngaviluttoq
2017-imut aningaasanut inatsisissatut siunnersuut saqqummiunneqaqqaarmat isertitat aningaasartuutillu ukiuni sisamani oqimaaqatigiittussatut missingersorneqarput. Aningaasanulli inatsit akuersissutigineqartoq 145 millionit koruuninik amigartooruteqarfiuvoq.
Amigartoorutilli amerlanerulersinnaapput. Aningaasanummi inatsit nalorninartunik tunngaveqartoq, Sulisitsisut Peqatigiiffianni pisortaq, Brian Buus Pedersen isumaqarpoq.
- Aaqqissuusseqqinnerit suli naammassineqarnikuunngitsut inatsisip ilaatigut tunngavigai. Taamaammat amigartoorutit amerlanerulernissaannut aarlerinartortaqarpoq, Brian Buus Pedersen KNR-imut e-malikkut allappoq.
AAMMA ATUARUK Naalakkersuisoqatigiit nutaat 145 millionit koruuninik amigartooruteqarnissaq siunnerfigigaat
Aalisakkanut akigititat qaffasinneri, uuliap akikinnera arlalinnillu annertuunik sanaartortoqarnera pissutigalugit Nunarput maanna aningaasarsiorluarfiuvoq.
Raajanulli akigititat nunani tamalaani qaffakkiartorunnaareerput, uuliallu akiata taama appasitsigiinnarnissaa nalorninarpoq.
Taamaammat Nunatta aningaasarsiorfiulluaannarnissaa nalorninartoq, aningaasarsiorfiulluartunilu sipaaruteqarnissaq pingaaruteqaraluartoq, Brian Buus Pedersen isumaqarpoq.
- Aningaasanut inatsit pisortat aningaasaqarnerannut ilungersunartorsiortitsinerulerpoq, ukiunilu aningaasarsiorfiulluartuni ukiunut aningaasarsiornerluffiusunut sipaarnissamik pisariaqartitsinermut allanngortitassaanngitsumik kipisivoq, Brian Buus Pedersen allappoq.
AAMMA ATUARUK Siunissami unammilligassat annikillinavianngillat
Aningaasartuutit isertitaninngaanniit amerlanerulernissaat ilimagineqareerpoq nikingassullu anginerulertussanngornissaa Sulisitsisut Peqatigiiffiannit ernumassutigineqarpoq.
- Aningaasanut inatsit Nunatsinni aningaasaqarnikkut unammillernartut eqqarsaatigalugit uppernassuseqartumik attartuumillu tungaanut aallartitsinngilaq, Brian Buus Pedersen allappoq.
